ललितपुरको कुपण्डोलबाट पुल्चोकतर्फ जाँदा सडकको डिभाइडरमा स–साना ढुंगा राखेर कलात्मक ढंगले सन्देशहरू लेखेको देख्न सकिन्छ ।

बिरुवा समेत रोपिएको डिभाइडरमा सवारी चालकलाई सुरक्षित यात्राका लागि प्रोत्साहित गर्ने खालका सन्देश लेखिएका ढुंगा प्रस्टै देख्ने गरी राखिएका छन् ।

ती ढुंगामा सेतो रंगले रङ्ग्याएर ड्राइभ स्लो, टेक केयर, शुभ यात्रा, गुड डे, सुरक्षित यात्रा गरौं, हाम्रो ललितपुर, ज्वजलपा जस्ता २८ फरक–फरक सन्देश लेखिएका छन् ।

सडक आसपासमा यात्रुलाई सुरक्षित यात्राका लागि प्रोत्साहित गर्ने खालका सन्देश राख्नु सामान्य भए पनि यहाँ गरिएको ढुंगाको प्रयोग अलि नौलो र पर्यावरणमैत्री देखिन्छ ।

ती​ ढुंगाहरूले सचेतना फैलाउन एक हदसम्म ट्राफिक प्रहरीको काम गरिरहेका छन् ।

कम खर्च, वातावरणमैत्री

सवारी चालकलाई लक्षित गरी यसरी सन्देश राख्ने काम ललितपुर महानगरपालिकाले गरेको हो ।

बाटोमा फ्लेक्स बोर्डहरू राख्दा घाम र पानीले छिट्टै बिग्रिने भएकाले यसको विकल्पमा ढुंगा प्रयोग गरिएको ललितपुर महानगरपालिकाका नगर प्रहरी प्रमुख सीताराम हाछेथुले बताए ।

‘फ्लेक्स बोर्डहरू घामपानीले छिट्टै बिग्रिन्छ । त्यसलाई राख्न खर्च पनि धेरै लाग्छ । तर, ढुंगामा सन्देश राख्दा आकर्षक, दिगो र वातावरणमैत्री हुने भएकाले यो उपाय अपनाएका हौं,’ हाछेथुले भने ।

ललितपुरको सडक सजावटमा नगरपालिकाले पछिल्लो समय लगानी र विभिन्न प्रयोगहरू गर्दै आएको छ, त्यसैमध्येको एक हो ढुंगामा राखिएको सन्देश । 

हाछेथुका अनुसार, महानगरपालिकाले अहिलेसम्म कुपण्डोलदेखि पुल्चोकसम्मको डिभाइडरमा २२० वटा ढुंगामा विभिन्न सन्देशहरू राखिएको छ ।

अब तत्कालै थप १०० वटा ढुंगामा रंगरोगन गरेर सन्देश लेखी जावलाखेल–लगनखेल सडक खण्डमा राख्ने तयारी छ ।

सन्देश राख्नका लागि गोलो आकारका ती ढुंगाहरू काभ्रेदेखि ल्याएको हाछेथुले बताए ।

‘हामीले काभ्रेको रोशी खोलाबाट तीन ट्रक ढुंगा ल्याएका थियौं । त्यसैलाई डिभाइडरमा सजाइएको हो’, उनले भने, ‘यसरी सन्देश राख्ने क्रममा खासै ठूलो खर्च भएको छैन ।’

तीन महिना अगाडिबाट शुरू भएको यो कामका सम्बन्धमा निकै सकारात्मक प्रतिक्रिया आएको उनले बताए ।

कसरी आयो सोच ?

ललितपुरका नगर प्रहरी प्रमुख सीताराम हाछेथु केही समयअगाडि भक्तपुरतर्फ जाँदै थिए । 

भक्तपुरको जीतपुर पुग्दा ‘सरस्वती मन्दिर यता’ भनेर लेखिएको ठूलो ढुंगामा उनको नजर पर्‍यो । ढुंगामा लेखिएको उक्त सन्देशले हाछेथुको दिमागमा नयाँ आइडिया फुर्‍यो ।

‘बाटोमा राखिएका फ्लेक्सहरू घामपानीले खिइएका थिए । तिनमा राखिएका सन्देश पनि प्रस्ट बुझिने खालको थिएन,’ हाछेथुले भने, ‘यसरी ढुंगामा सन्देश लेख्दा घामपानीले पनि असर नगर्ने र जमेको धूलो पनि पानीले सजिलै पखाल्ने भएकाले यो निकै प्रभावकारी देखियो ।’

उनले यो आइडिया ललितपुर महानगरपालिकाका प्रमुख चिरिबाबु महर्जनसँग शेयर गरे । महर्जनले पनि सकारात्मक जवाफ दिएपछि काभ्रेबाट ढुंगा ल्याएर काम शुरू गरेको हाछेथुले बताए ।

सकारात्मक प्रतिक्रियाबाट हौसिएका हाछेथु यसलाई ललितपुर महानगरभरी फैलाउने योजनामा छन् ।