नेकपा एमाले कैलालीको आठौं जिल्ला अधिवेशनबाट अध्यक्षमा रतन थापा विजयी भएका छन् । अध्यक्षका प्रत्यासी रणबहादुर चन्दलाई ४ मतले पराजित पार्दै थापा विजयी भएका हुन् । 

थापाले २८७ मत पाएका थिए भने चन्दले २८३ मत पाएका थिए । 

उपाध्यक्षमा सीताराम बुढाथोकीलाई पराजित गर्दै दुर्गाप्रसाद जोशी विजयी भएका छन् । जोशीले ३२७ मत पाए भने बुढाथोकीले २०९ मत पाए । 

सचिवमा डेजी पाण्डेले २९४ मत ल्याएर विजयी भएका छन् । उनका प्रतिद्वन्द्वी दानबहादुर विकले २६० मत पाए । यस्तै उपसचिवमा ममता चौधरी र लोकेन्द्रबहादुर शाही विजयी भएका छन् ।

सर्वसम्मत नेतृत्व चयन गर्न नसक्दा मतदान भएको थियो । एकातिर पार्टीका सुदूरपश्चिम इन्चार्ज लेखराज भट्ट र सहइन्चार्ज कर्ण थापाको प्यानल र अर्कोतिर पार्टीका पूर्वउपाध्यक्ष भीम रावल र पार्टी अध्यक्ष ओली पक्षीय मानिने एमाले केन्द्रीय सदस्य तथा कैलाली इन्चार्ज नारदमुनि रानाको प्यानल चुनावी मैदानमा उत्रिएको थियो ।

भट्ट र थापाको प्यानलबाट अध्यक्षका लागि कैलाली अध्यक्ष तथा प्रदेश सभा सदस्य रतन थापाले उम्मेदवारी दिएका थिए, जो ४ मतले विजयी भए । 

भीम रावलको प्यानलबाट अध्यक्षमा उम्मेदवारी दिएका रणबहादुर चन्द र उपाध्यक्षमा उम्मेदवारी दिएका सीताराम बुढाथोकी पराजित भए । 

उपाध्यक्षमा विजयी भएका जोशीले भट्ट प्यानलबाट उम्मेदवारी दिएका थिए ।

अध्यक्ष र उपाध्यक्षका उम्मेदवार हारे पनि पदाधिकारीतर्फ पार्टीका भीम रावल प्यानलकै पदाधिकारीको वर्चश्व देखिएको छ । बाँकी ३ पदाधिकारी रावल प्यानलबाटै विजय भएका हुन् । रावल प्यानलबाट सचिवमा पाण्डे, उपसचिवमा चौधरी र शाही विजयी भए ।

केन्द्रीय लाइन ‘क्लियर’ नदेखिए पनि सुदूरपश्चिममा नेतापिच्छे गुटमा विभाजित भएको एमालेमा पूर्वमाओवादी धारलाई भने एमाले कैलालीको अधिवेशनमा झट्का लागेको छ । पूर्वमाओवादी अर्थात् लेखराज भट्टकै लाइनबाट सचिवमा उम्मेदवारी दिएका दानबहादुर विश्वकर्मा फराकिलो मतान्तरका साथ पराजित भए ।

तर, सचिवमा विजयी भएका पाण्डेले अब पार्टीभित्र पूर्व एमाले र पूर्वमाओवादी धार नभएको बताएका छन् । पार्टीको आन्तरिक लोकतन्त्रको आधारमा उम्मेदवार हुन पाउने र नेता छान्न पाउने अधिकार रहेकोले यो वा त्यो खेमा भन्न नपाइने उनको भनाइ छ ।