रिभर फन बिच रिसोर्टले त्रिशूली नदीमा साढे ५ सय मिटरको जीपलाइन निर्माण गरेको छ । जीपलाइन तयार भएर सफल परीक्षण भएको पनि रिसोर्टले जानकारी दिएको छ । 

रिभर फनले पृथ्वी राजमार्गको चुमखोलादेखि गोरखा बुट्टारको रिसोर्टसम्म पुग्ने गरी बनाएको उक्त जीपलाइनको सफल परीक्षण भएको रिसोर्टका प्रबन्ध निर्देशक शंकर अधिकारीले बताए । 

१२ वर्षदेखि सञ्चालनमा रहेको यो रिसोर्टले ग्राहकको सुविधा र आकर्षणका लागि जीपलाइन सञ्चालन गरेको उनले बताए । अधिकारीका अनुसार ५५८ मिटर लामो जीपलाइनको अधिकांश भाग त्रिशूली नदि माथि पर्छ । 

जसकारण यो जीपलाइन साहसिक र रोमाञ्चक हुने अधिकारीले बताए । नदिमाथिको रोमाञ्चक उडान हुने भएकाले जीपलाइन नेपालकै नमूना जीपलाइन भएको पनि रिसोर्टका प्रबन्ध निर्देशक अधिकारी बताउँछन् । 

परीक्षण उडान सफल भएकोले अब केही हप्ताभित्रै आवश्यक प्रक्रिया पूरा गरी व्यावसायिक बुकिङ लिइने रिसोर्टले जानकारी दिएको छ । जीपलाइन खेल्न प्रतिव्यक्ति एक हजार ५०० रूपैयाँ र फोटो/भिडियोको थप ५०० रूपैयाँ लाग्ने उल्लेख छ । फोटो/भिडियोको काम एड्भेन्चर क्षेत्रको भिडियोग्राफीमा सक्रिय कम्पनी मदानी मिडिया नेटवर्कले गर्ने अधिकारीले बताए ।

१८ मिटर अग्लो पाँच तले टावरको चौथो तलाबाट जीपलाइन शुरू हुने जीपलाइनमा दुई समानान्तर रोप रहने भएकोले दुई जना एकैपटक एक अर्कालाई हेर्दै खेल्न मिल्ने गरी बनाइएको छ । 

यस रिसोर्टले ९५ मिटर स्काइ रोप साइक्लिङसमेत निर्माण भइरहेको परियोजना डिजाइनर सिभिल इन्जिनियर मुकेश अधिकारीले बताए । यो रिसोर्टले मिनि जीपलाइन, पिङ, रोप कोर्सलगायतका गतिविधिसहितको किड्स एड्भेन्चर पार्कसमेत निर्माण गरिरहेको छ ।

जीपलाइनका लागि बनाइएको टावरको तीन वटा तल्लामा ‘रिभर फन क्याफे’ सञ्चालन हुने उल्लेख छ । रिसोर्टमा आउने ग्राहकलाई प्याकेजमा नै सेवा दिन सकिने उल्लेख छ । 

रिसोर्टले कफी बार, कक्टेल, मक्टेल, क्रन्चीलगायत सामान्यतया राजमार्गका क्याफेमा नपाइने आइटमसहित क्याफे सञ्चालन गर्ने बताइएको छ ।

जीपलाइन, क्याफे, स्काइ साइक्लिङ, किड्स एड्भेन्चर पार्कसहितका योजना सम्पन्न गर्न करीब ७ करोड रूपैयाँ खर्च हुने अनुमान गरिएको छ । रिसोर्टमा ७० जना अट्ने नयाँ कोठाहरू समेत थप भइरहेको पनि उल्लेख छ ।