पाकिस्तानले नयाँ सुरक्षा नीतिमा आगामी दिनमा छिमेकी मुलुकहरूसँग शान्ति र आर्थिक कूटनीतिलाई प्रमुखता दिइने उल्लेख गरेको छ । 

गोप्य राष्ट्रिय सुरक्षा नीतिमा भारतसँग कश्मीर मुद्दाको असन्तम समाधान नखोजिकनै व्यापार र कारोबारी सम्बन्धलाई अघि बढाइने पनि उल्लेख छ । 

कश्मीर मुद्दाका विषयमा आणविक हतियार भएका मुलुक भारत र पाकिस्तानबीच तनाव छ । त्यसले गर्दा व्यापार र आर्थिक सम्बन्ध पनि खराब छ । 

सुरक्षा नीतिसँग जोडिएका एक पाकिस्तानी अधिकारीले एक्सप्रेस ट्रिब्युनलाई बताए, ‘हामी अबको १०० वर्ष भारतसँग दुश्मनी गर्ने छैनौं । नयाँ नीतिमा छिमेकी मुलुकहरूसँग शान्तिमा जोड दिइएको छ ।’ 

यस विषयमा कुराकानी र प्रगति भएमा भारतसँग पहिले जस्तै व्यापार र व्यावसायिक सम्बन्ध सामान्य बन्न सक्ने उनले बताए । 

भारतले कश्मीरलाई दिइएको विशेष दर्जा खारेज गरेपछि पाकिस्तानसँगको सम्बन्ध थप चिसिएको छ । उक्त कदमपछि पाकिस्तानले कूटनीतिक सम्बन्ध घटाएको थियो र द्विपक्षीय व्यापार निलम्बित गरेको थियो । 

गत फेब्रुअरी महिनामा दुई देशको सम्बन्ध सामान्य बनाउने दिशामा केही प्रगति भएको थियो । त्यतिखेर दुवै पक्ष एलओसीमा सीजफायर उल्लंघन रोक्न सहमत भएका थिए । तर यो प्रक्रिया धेरै अघि बढेन । 

नयाँ राष्ट्रिय सुरक्षा नीतिमा पाकिस्तानले भूरणनीतिक भन्दा पनि भूआर्थिक नीति अपनाउने उल्लेख छ । नीतिमा गरिएको यस परिवर्तनले भारतसँगको सम्बन्ध सुध्रिने आशा गरिएको छ । 

भारतीय विशेषज्ञहरूले पाकिस्तानको कथनी र करनीमा अन्तर रहेकाले विश्वास गर्न नसकिने बताएका छन् । 

नयाँ नीति ल्याएको भए पनि भारतसँग कश्मीर विवादलाई पाकिस्तानले महत्त्वपूर्ण राष्ट्रिय नीतिका रूपमा पहिचान गरेको छ ।