हिमालय  बैंक र नेपाल इन्भेष्टमेन्ट बैंकबीच सम्झौता भएको १० महिनापछि मर्जर प्रक्रिया भाँडिएको छ  ।

मर्जर विपक्षमा रहेका करीब ३६ प्रतिशत शेयरधनीका कारण यी दुई बैंक एक नहुने भएका छन् । 

शुक्रवार भएको हिमालयन बैंकको २९ औं वार्षिक साधारण सभामा हिमालयन बैंकका अध्यक्ष प्रचण्डबहादुर श्रेष्ठले शेयर आदानप्रदान अनुपात नमिलेको भन्दै मर्जरमा नजाने निर्णय सुनाएपछि औपचारिक रूपमै यी दुई बैंकबीच मर्जर भाँडिएको हो ।

हिमालन बैंकको वार्षिक साधारण सभाले मतदानबाट मर्जरमा नजाने टुंगो लगाएको हो । मर्जरमा जान ७५ प्रतिशत शेयरधनीको समर्थन आवश्यक भए पनि विपक्षमा रहेका शेरधनी ३६ प्रतिशत भएका कारण मर्जर भाँडिएको हो । 

हिमालय बैैंकमा शेयर रहेको कर्मचारी सञ्चयकोष, अध्यक्ष श्रेष्ठको छायाँ इन्टनरनेशनल र एन ट्रेडिङको विरोधपछि मर्जर प्रक्रिया भाँडिएको हो । यो बैंकमा सञ्चय कोषको १४.५८, श्रेष्ठको छाँया इन्टरनेशनलको ८.९ र एन ट्रेडिङ १२.७७ प्रतिशत शेयर स्वामित्व रहेको छ । 

३६ प्रतिशत शेयरधनीले नेपाल इन्भेष्टमेन्ट बैंकसँग मर्जरमा जाने विपक्षमा भोट दिएपछि मर्जर असफल बनेको हो ।  

मर्जरको लागि विशेष प्रस्ताव स्वीकृत हुनका लागि कम्तीमा ७५ प्रतिशत शेयरधनीले उक्त प्रस्ताव स्वीकृत गर्नुपर्ने कानूनी प्रावधान छ । विशेष प्रस्ताव अस्वीकृत भएपछि हिमालयन बंैकको वार्षिक साधारण सभामा सञ्चालकहरूबीच नै वादविवाद र चर्काचर्कीसमेत भएको छ ।

साधारण सभामा ‘शेयर आदनप्रदान अनुपात’ नमिलेको भन्दै अध्यक्ष प्रचण्डबहादुर श्रेष्ठले शुरूमै विरोध गरेका थिए । 

उनले भने, ‘स्वार रेसियो इन्भेस्टमेन्ट र हिमालयको १००:७८ मात्रै हुनेछ । प्रतिकित्ता २२ रूपैयाँ घाटा खाएर इन्भेष्टमेन्टसँग मर्जरमा जान सकिँदैन । त्यसैले यो मर्जर प्रक्रिया अगाडि नबढ्ने निर्णय भएको छ ।’

हिमालयन बैंकले शुक्रवार केन्द्रीय कार्यालय कमलादीमा बोलाएको साधारण सभामा सञ्चालकहरूले नै लफडा गरेका थिए ।