नेपाली कांग्रेसका उपसभापति धनराज गुरुङले लिपुलेक, कालापानी र लिम्पियाधुराको समस्या समाधान गर्न सरकारलाई आग्रह गरेका छन् ।

नेपाली कांग्रेस रुपन्देही क्षेत्र नम्बर ३ ले शुक्रवार भैरहवामा आयोजना गरेको कार्यक्रममा बोल्दै उपसभापति गुरुङले भारतीय प्रधानमन्त्री नरेन्द्र मोदीले नेपालको भूमि हो भनेर जान्दाजान्दै लिपुलेकसम्म सडक बनाउँदैछौ भन्नु खेदजनक र भत्र्सनायोग्य अभिव्यक्ति भएको टिप्पणी गरे । 

केही दिनअघि भारतीय प्रधानमन्त्री मोदीले कालापानी, लिपुलेकसम्म सडक बनिरहेको बताएका छन् । गुरुङले अब समस्या समाधान गरी सधैंका लागि हाम्रो भूमि फिर्ता लिनुपर्ने बताए ।

विगतमा नेपाल सरकारले नक्सा जारी गरे पनि पाठ्यक्रममा छाप्न भने थरथर कापेको आरोप लगाए । सुस्तादेखि कालापानीसम्म नेपाली भूमि मिचिएको भन्दै यसबारे पटक–पटक आफूले पार्टी र सरकारको ध्यानाकर्षण गरेको बताए ।

उपसभापति गुरुङले मुलुकको विकास नहुनु एउटा पनि असल नेता नहुनुको कारण भएको बताए ।