काठमाडौंबाट पोखरा उडेको गुण एयरलाइन्सको एक बीचक्राफ्ट जहाज सात मिनेटमै पुनः त्रिभुवन अन्तर्राष्ट्रिय विमानस्थल नै फर्किएको छ । 

आइतवार बिहान साढे १० बजे पोखरा उडेको यो जहाजमा साढे तीन मिनेटमै प्राविधिक समस्या देखिएको थियो ।

‘उक्त जहाजको इन्डिकेटरले जहाजमा केही समस्या रहेको देखायो त्यसपछि तुरुन्तै विमानस्थल फर्काइएपछि डोर लक नभएको फेला पर्‍यो,’ त्रिभुवन अन्तर्राष्ट्रिय विमानस्थलका महाप्रबन्धक भोला गुरागाईले भने । 

उनका अनुसार जहाज उडेको ७ मिनेटमै पुनः विमानस्थल नै फर्किएको छ । उक्त जहाजको प्राविधिक परीक्षणपछि पुनः उडानयोग्य भएको पनि विमानस्थल कार्यालयले जानकारी दिएको छ ।

‘जहाजको यात्रु चढ्ने ढोका राम्रोसँग लक नभएकाले इन्डिकेटरले संकेत गरेको रहेछ,’ गुण एयरलाइन्सका प्रवक्ता प्रज्ज्वल थापाले भने, ‘अवतरणपछि परीक्षण भइसक्यो र जहाज फेरि अर्को गन्तव्यमा उडान गर्न तयारी अवस्थामा बसिसकेको छ ।’ उनका अनुसार अनुसार पोखरा उडान अर्को जहाजबाट गराइएकाले अब उक्त जहाज ३ बजे भरतपुर उड्ने छ ।