नेप्से २९ सय अंक नाघेको छ । साताको पहिलो दिन आइतवार ६९ अंकले शेयर बजार बढेर नेप्सेले २९२६.७४ अंकमा पुगेको हो । 

नेप्से बढेसँगै आइतवार ९ अर्ब ६७ करोड रूपैयाँको कारोबार भएको छ । बजार बढेका कारण सबै समूहका सूचकमा हरियाली देखिएको छ ।

नेपाल स्टक एक्सचेञ्ज लिमिटेड (नेप्से) का अनुसार आइतवार बजार ६९ अंकले बढेको हो । बजार बढेसँगै सेन्सेटिभ इन्डेक्स २.२२ प्रतिशतले बढेर ५४२.६३ अंकमा पुगेको छ ।

आइतवार नेप्सेमा सूचीकृत २२९ कम्पनीका एक करोड ८२ लाख ५४ हजार ४२५ कित्ता शेयर किनबेच भएको छ । 

बजार बढेको दिन ३ वटा कम्पनीका शेयरमा पोजिटिभ सर्किट लागेको छ । स्ट्याण्डर्ड चार्टर्ड बैंक, मध्य भोटेकोशी जलविद्युत् र किसान लघुवित्तको शेयर मूल्य क्रमशः १०, ९.९९ र ९.९४ प्रतिशतले बढेको छ ।

आइतवार सबैभन्दा बढी गुमाउनेमा भने १०.२५ प्रतिशतको ग्लोबल आईएमई बैंक डिबेञ्चर २०८०/८१ का लगानीकर्ताले छन् । यसका लगानीकर्ताले ३.५९ प्रतिशतले घाटा व्यहोरेका छन् । 

आइतवार सबैभन्दा बढी कारोबार हुनेमा भने अरुण भ्याली हाइड्रो रहेको छ । यसको ३६ करोड ४३ लाख १७ हजार ५०० रूपैयाको शेयर कारोबार भएको छ ।

नेप्से सूचक ३ भदौमा अहिलेसम्मकै उच्च बिन्दू (३१९८.६० अंक)मा पुगेको थियो । त्यसपछि भने बजारमा उतारचढाव आइरहेको छ । नेप्सेमा सूचीकृत कम्पनीहरूको यस्तो कारोबार ३१ साउनमा हालसम्मकै उच्च (२१ अर्ब ६३ करोड ७६ लाख रूपैयाँ)को कारोबार थियो ।