अमेरिका र बेलायतका गुप्तचर संस्थाहरूले युक्रेनका विषयमा सनसनीपूर्ण खुलासा गरेका छन् । 

गोप्य प्रतिवेदनमा उल्लेख गरिएअनुसार, रुसका साइबर लडाकूह युक्रेनमा पसेका छन् । उनीहरूले गत शुक्रवार युक्रेनका एक दर्जनजति वेबसाइट ह्याक गरेका थिए । 

अमेरिकाको रक्षा मन्त्रालयका प्रवक्ता जोन कर्बीका अनुसार, यी लडाकूहरू राष्ट्रपति भ्लादिमिर पुटिनको आदेशको प्रतीक्षा गरिरहेका छन् ।

ती लडाकूहरूलाई ७० वटा स्थानको सूची दिइएको छ । 

रुसले सन् २०१७ मा पनि युक्रेनको महत्त्वपूर्ण साइबर ठेगानामा आक्रमण गरेको थियो । 

उता बेलायतको हाउस अफ कमन्सको डिफेन्स कमिटीका अध्यक्ष टोबाइस एलवूडले बेलायती गोप्य प्रतिवेदनलाई उद्धृत गर्दै युक्रेनमाथि रुसको आक्रमण केही दिनभित्रै हुने बताए । रुसले जेनेभा वार्ता विफल भएपछि युक्रेनको घेराबन्दीलाई बढाएको छ । 

रुसले छद्म आक्रमण गर्ने पश्चिमको दाबी छ । 

अमेरिका र बेलायतका सैन्य विशेषज्ञहरूका अनुसार, युक्रेन सीमामा रुसले कैयौं महिनादेखि घेराबन्दी गरिरहेको छ । युक्रेन सीमामा रुसका लगभग एक लाख सैनिक, १२ हजार ट्यांक, ३०० लडाकू विमान, १६ सय तोप, २४० हेलिकप्टर, ७५ वटा जहाज र ६ पनडुब्बीहरू तैनाथ छन् । 

रुसको रक्षा मन्त्रालयले यो आत्मरक्षाका लागि गरिएको तैनाथी भनेको छ । तर सैन्य विशेषज्ञहरूका अनुसार, युक्रेनलाई तीनतर्फबाट घेराबन्दी गर्ने रुसको रणनीतिअन्तर्गत तैनाथी गरिएको हो । 

रुसले सन् २०१४ मा युक्रेनमाथि आक्रमण गरेर क्राइमिया हात पारिसकेको छ ।