नेपाली कांग्रेसका महामन्त्री गगनकुमार थापाले आगामी वैशाखमै स्थानीय तहको चुनाव हुने बताएका छन् । 

लोकान्तर डट्कमसँगको अन्तर्वार्तामा थापाले संविधान अनुसार वैशाखमा जसरी पनि चुनाव गर्नैपर्ने र त्यसलाई कुनै पनि बहानामा सार्न नमिल्ने बताएका छन् । 

‘विभिन्न कारण देखाएर चुनाव सार्न खोजियो भने त्यो संविधानको अपव्याख्या हुन्छ । हामी त्यसो हुन दिने छैनौं । कांग्रेस वैशाखमा चुनाव गर्ने पक्षमा छ । गठबन्धनलाई पनि त्यसअनुसार तयार गरिन्छ,’ महामन्त्री थापाले भने । 

गठबन्धनमा रहेका केही दलहरूले तत्काल चुनाव नचाहेको भए पनि संविधान अनुसार वैशाखमा स्थानीय तहको चुनाव गर्नैपर्ने उनले बताए ।

‘प्रधानमन्त्री वैशाखमा स्थानीय तहको चुनाव गर्ने कुरामा स्पष्ट हुनुहुन्छ । मैले भर्खरै उहाँसँग चुनाव र सरकारका कामको बारेमा विस्तृतमा छलफल गरेको छु । कांग्रेसकै कारण चुनाव सर्छ भन्ने कुरामा सत्यता छैन, त्यो हावादारी हो,’ थापाले लोकान्तरसँग भने । 

स्थानीय तह एक दिन पनि जनप्रतिनिधिविहीन नहोस् भन्ने उद्देश्यले संविधान र कानूनमा सोही अनुसारको व्यवस्था गरिएकाले त्यसलाई पालना गर्नुपर्ने थापाले बताए । 

नेपाली कांग्रेस नेतृत्वको गठबन्धन सरकारको काममा सन्तोष गर्ने ठाउँ नभएको स्वीकार्दै उनले कार्यशैली सुधार गर्न पार्टी सभापति एवं प्रधानमन्त्री देउवालाई सुझाव दिएको उनले बताए ।

यसअघि प्रधानमन्त्री देउवाले कांग्रेसको महाधिवेशन सम्पन्न गराउन लाग्नुपरेकाले सरकारको काममा कम ध्यान गएको र अबको दिनमा देउवाले पार्टीभन्दा बढी सरकारलाई ध्यान दिने थापाले बताए । 

‘हामीले उहाँलाई प्रधानमन्त्री बढी सभापति कम हुनुुस् भनेका छौं । पार्टीको सम्पूर्ण  जिम्मेवारी हामीले सम्हाल्छौं भनेका छौं । सरकारले तत्काल गर्नुपर्ने केही कामको बारेमा योजना पनि बनेको छ,’ थापाले भने ।

फरक सन्दर्भमा उनले अमेरिकी सहयोग एमसीसी संसदमा पुगेकाले त्यही विस्तृतमा छलफल गरेर टुंगोमा पुर्‍याउनुपर्ने बताए । 

उनले भने, ‘कांग्रेस एमसीसी पारित गरेर जानुपर्छ भन्ने पक्षमा छ । कांग्रेसको कार्यकर्ता भएका कारण अहिलेसम्म मेरो त्यसमा फरक मत छैन । जनस्तरमा पुगेको विषयलाई गम्भीर रूपमा छलफल गरेर टुंगो लगाउनुपर्छ । एमसीसीको सन्दर्भमा मेरो मत संसदमा छलफल हुँदा राख्ने नै छु । अहिले पार्टीको भन्दा मेरो फरक धारणा छैन ।’

कांग्रेसका महामन्त्री थापासँग लोकान्तर डट्कमले गरेको विस्तृत अन्तर्वार्ता मंगलवार राति ८ बजे लोकान्तर डट्कम र फेसबूक पेजमार्फत प्रसारण हुनेछ ।