बेलायतको राजधानी लन्डनमा टर्कीसँग जोडिएको एक ल फर्म स्टोक ह्वाइटले कश्मीरमा भारतका गृहमन्त्री अमित शाह र सेनाप्रमुख जनरल एमएम नरवणेलाई पक्राउ गर्न माग गरेको छ । 

कश्मीरमा युद्धअपराध गरेको भन्दै उनीहरूलाई पक्राउको माग राखिएको हो । 

उक्त संस्थाले कश्मीरमा बस्ने दुई हजारजनाको बयान उल्लेख गरिएको रिपोर्ट पनि लन्डन प्रहरीलाई सुम्पेको छ । उक्त बयानले कश्मीरमा भारत सरकारको युद्धअपराधलाई प्रमाणित गर्ने संस्थाको दाबी छ । 

बेलायतको कुनै पनि सरकारी निकायले यस उजुरीका विषयमा भारतीय उच्चायोगसँग सम्पर्क नगरेको भारतीय अधिकारी बताउँछन् । उनले भने, ‘यो रिपोर्ट कुनै जवाफ दिन समेत योग्य छैन । यसमा कथित नरसंहार र मानवअधिकार उल्लंघनको उल्लेख छ तर पाकिस्तानले सीमापारबाट मच्चाएको आतंकवादप्रति यो मौन छ ।’

स्टोक ह्वाइट ल फर्मको इस्तानबुल र लन्डनमा कार्यालय छ । यसले इस्लामिक कानूनमा विशेषज्ञता राख्छ । टर्की सरकारसँग यसको राम्रो सम्बन्ध छ । 

ल फर्मले कानूनको दायरामा रही आफ्नो अनुसन्धान इकाइले सार्वजनिक हितसँग जोडिएका मामिलाको अनुसन्धान गर्ने गरेको दाबी गरेको छ । आफ्नो रिपोर्ट इन्डिया वार क्राइम इन् कश्मीरलाई मेट्रोपोलिटन पुलिसको युद्धअपराध इकाइलाई सुम्पकेको ल फर्मले बताएको छ ।