विराटनगर उपमहानगरपालिकासँग पहिल्यैदेखि ३ वटा दमकल थिए तर प्रदेश सरकारले थप १ दमकल दिएर ४ दमकल पुर्‍याएको छ ।

विराटनगरमा फालाफाल दमकल हुँदा १ नम्बर प्रदेशकै थुप्रै स्थानीय तहमा एउटा पनि दमकल छैनन् । प्रदेश सरकारले दमकल नभएको ठाउँमा वितरण गर्नुपर्नेमा आन्तरिक मामिला तथा कानूनमन्त्री केदार कार्कीको राजनीतिक स्वार्थले सुगम जिल्लामा दमकल वितरण गरिएको छ ।

प्रदेश सरकारले मुख्यमन्त्री अत्यावश्यक सेवा केन्द्रअन्तर्गत दुर्गमका स्थानीय तहका लागि खरिद गरेका २ वटा दमकल मन्त्री कार्कीको स्वार्थका कारण सुगमका स्थानीय तहमा वितरण भएका छन् ।

सोलुखुम्बुको सोताङ गाउँपालिका र ताप्लेजुङको फुङलिङ नगरपालिकाका लागि मन्त्रालयले खरिद गरेका दमकल विराटनगर महानगरपालिका र सुनसरीको देवानगञ्ज गाउँपालिकालाई वितरण गरिएको छ ।

नेपाली कांग्रेस संसदीय दलका नेता राजीव कोइरालालाई रिझाएर मन्त्री बनेका कार्कीले एउटा दमकल नेता कोइरालाको गृहजिल्ला सुनसरीमा दिएका छन् । कोइरालालाई खुशी बनाउन मन्त्री कार्कीले सुनसरीको देवानगञ्ज गाउँपालिकालाई दमकल दिएका हुन् । उनले नेता राजीव कोइरालालाई साक्षी राखेर दमकलको साँचो गाउँपालिका अध्यक्ष लालीप्रसाद मेहतालाई हस्तान्तरण गरेका छन् । गाउँपालिका नेता कोइरालाको निर्वाचन क्षेत्रमा पर्छ ।

मन्त्री कार्कीले विराटनगर महानगरपालिकाका मेयर भीम पराजुलीसँग सम्बन्ध सुधार्नका लागि महानगरपालिकालाई समेत दमकल दिएका छन् । विराटनगर महानगरसँग ३ वटा दमकल हुँदाहुँदै कार्कीले थप १ दमकल दिएका हुन् ।

कांग्रेस महाधिवेशनपछि मेयर पराजुली र मन्त्री कार्कीबीच सम्बन्ध चिसो हुँदै आएको थियो । पराजुली महाधिवेशनमा फरक समूहमा प्रवेश गरेर केन्द्रीय सदस्य बनेपछि समबन्ध चिसो बनेको हो । पराजुली केन्द्रीय सदस्य बनेका छन् भने कार्की पराजित भएका छन् ।

स्थानीय तहका जनप्रतिनिधि असन्तुष्ट

छलफल नै नगरी मन्त्री कार्कीले दमकल अन्य पालिकालाई दिएको भन्दै विरोध भएको छ । ‘बर्खायाम भएकाले मन्त्रालयबाट दमकल ल्याउन सकिएको थिएन,’ सोलुुखुम्बुको सोताङ गाउँपालिकाका अध्यक्ष वीरबहादुर राईले भने, ‘राष्ट्रियसभा चुनावमा आउँदा ल्याउने तयारी गरेका थियौं तर थाहै नदिई अर्कैलाई बाँडिसकेछन् ।’

ताप्लेजुङको पुङलिङ गाउँपालिकाका अध्यक्ष छत्रपति प्याकुरेलले दमकल लिन जाँदा मन्त्रीले अन्यत्रै बाँडेको भनेर कर्मचारीले भनेपछि रित्तै हात फर्किएको बताए । मन्त्रालयले आर्थिक वर्ष २०७६/०७७ मा ५२ लाख ८० हजार रुपैयाँको दरले ११ वटा र आव ०७७/७८ मा ५७ लाख रुपैयाँका दरमा ३ वटा गरी १४ वटा दमकल ७ करोड ५१ लाख ८० हजार रुपैयाँमा खरिद गरेको थियो ।

मन्त्रालयले सुनसरीको कोशी गाउँपालिका, मोरङको कानेपोखरी गाउँपालिका, झापाको कमल गाउँपालिका, इलामको देउमाई नगरपालिका, पाँचथरको फिदिम नगरपालिका, तेह्रथुमको आठराई गाउँपालिकामा दमकल र पीकअप भ्यान वितरण गरेको छ । 

धनकुटाको धनकुटा नगरपालिका, खोटाङको खोटेहाङ गाउँपालिका, ओखलढुंगाको सिद्धिचरण नगरपालिका, भोजपुरको हतुवागढी, उदयपुरको रतुवामाई र संखुवासभाको खाँदवारी नगरपालिकामा समेत दमकल वितरण गरेको छ । 

मन्त्री कार्कीले तोकिएको पालिकासम्म दमकल पुर्‍याउनै समस्या भएकाले तराईकै जिल्लाका पालिकालाई दमकल दिएको बताए । विराटनगरलाई दिँदा प्रदेशका सबै जिल्लामा पुग्ने र देवानगञ्जलाई दिँदा सुनसरीका धेरै पालिकालाई हुने भएकाले दिएको उनले बताएका छन् ।