विगत एक सातादेखि बाक्लो हुस्सु र शीतलहरले तराईको जनजीवन कष्टकर बनेको छ ।

लुम्बिनी प्रदेशसहित पश्चिम तराईमा विगत दश दिनदेखि घाम लागेको छैन । जाडो अत्यधिक बढ्दा जनजीवन नराम्रोसँग प्रभावित बनेको छ । 

आकाश धुम्म छ । मौसम नखुल्दा चिसो हावासँगै शीतलहर चलेपछि विपन्न वर्ग र मजदूरहरू मुख्य समस्यामा परेका छन् ।

मानिसहरू घरबाट बाहिर निस्किन सकेका छैनन् । पुस अन्तिम सातादेखि अत्यधिक चिसो बढेको हो । 

जसले गर्दा अस्पतालहरूमा रुघाखोकी र ज्वरोका बिरामी बढेका छन् । कोरोना र मौसमी रुघाखोकीका लक्षण मिल्दाजुल्दा हुने भएपछि धेरै कोरोना संक्रमण भएको कि भनेर सशंकित छन् ।

लुम्बिनी प्रादेशिक अस्पतालका सूचना अधिकारी डा.नेत्र रानाले अस्पतालमा कोरोना संक्रमित र उस्तै लक्षण भएका रुघाखोकी तथा ज्वरोका बिरामीको चाप बढेको बताए ।

डा. रानाले चिसोबाट बालबालिका र वृद्धवृद्धा बढी जोखिममा रहेको भन्दै सावधानी अपनाउन सर्वसाधारणलाई आग्रह गरे ।

चिसोका कारण श्वासप्रश्वाससम्बन्धी समस्यादेखि निमोनियाजस्ता घातक समस्यासम्म देखिन सक्ने चिकित्सिकहरूको भनाइ छ ।

जाडो बढेपछि चोकचोकमा दाउरा बालेर सर्वसाधारणहरू आगो तापेको देखिन्छन् ।

भैरहवा विमानस्थलको बिहानको तापक्रम ८/९ डिग्रीमा झर्ने गरेको छ । बाक्लो हुस्सुले सार्वजनिक यातायात र हवाई उडानमा पनि बाधा पुर्‍याएको छ । 

जाडो बढेपछि यहाँ केही मानिसहरू घाम ताप्नकै लागि पाल्पाको दोभान (बुटवलबाट ५ किलोमिटरको दूरीमा) पुग्ने गरेका छन् ।

मौसम पूर्वानुमान महाशाखाले बिहीवारदेखि उच्च भूभागमा हिमपातको सम्भावना रहेको भन्दै सतर्कता अपनाउन आग्रह गरेको छ ।

विगतका वर्षहरूमा चिसोबाट प्रभावित जनतालाई टोलटोलमा दाउरा वितरण गर्ने स्थानीय तहले भने अहिले त्यो काममा अग्रसरता देखाएका छैनन् । 

रुपन्देहीका प्रमुख जिल्ला अधिकारी (सीडीओ) ऋषिराम तिवारीले विपन्न समुदायलाई चिसोबाट जोगाउन पालिकाहरूसँग समन्वय गरी दाउरा र न्यानो कपडा वितरण गर्ने तयारीमा रहेको लोकान्तरलाई जानकारी दिए ।

‘हिजोदेखि चिसो अत्यधिक बढ्यो,’ प्रजिअ तिवारीले भने, ‘अवस्था नियालिरहेका छौं । विपन्न समुदायलाई दाउरा र कपडा वितरण गर्ने योजनामा जुटेका छौं ।’ 

कपिलवस्तु, बाँके, पश्चिम नवलपरासी र बर्दिया प्रशासनले पनि स्थानीय तहसँग समन्वय गरी दाउरा र न्यानो कपडा वितरण गर्ने तयारी गरेका छन् ।

समुदायमा कोरोना संक्रमण पनि बढेकाले त्यसतर्फ बढी ध्यान दिनुपर्ने हुँदा चिसोतर्फ ध्यान जान नसकेको पालिकाहरूको भनाइ छ । 

तर, बुटवल उपमहानगरपालिका प्रमुख शिवराज सुवेदीले चिसो बढेपछि सडक बालबालिकालाई खोज्दै न्यानो कपडा वितरण गरिएको बताए ।

यस्तै उपप्रमुख गुमादेवी आचार्यले दीर्घरोगीको विवरण संकलन गर्दै पोषणयुक्त खाद्यान्न र कपडा वितरण गर्न तयारी गरिएको बताइन् ।

देवदह नगरपालिकाका प्रमुख हिराबहादुर खत्रीले राहत वितरण कार्यक्रमलाई एकद्वार प्रणालीबाट विपन्नलाई पुर्‍याउने बताए । 

रूपन्देहीको दक्षिणी क्षेत्रका बासिन्दा अझै चिसोबाट बढी प्रभावित छन् ।  चिसोबाट बच्न न्यानो कपडासँग खानपानमा पनि ध्यान दिनुपर्ने चिकित्सकहरू बताउँछन् ।

‘जाडोबाट बच्नका लागि कपडा लगाएर मात्र हुँदैन, मौसमअनुसार तातो खालका खानेकुरा समेत खानुपर्छ । तर, कहिलेकाहीँ जाडोमा शरीर तातो बनाउन खानेकुरा खाँदा उल्टै स्वास्थ्यमा हानी पुग्छ । त्यसैले जाडोमा कस्ता खानेकुरा खाने र कस्ता नखाने भन्ने ज्ञान हुन पनि जरुरी छ,’ लुम्बिनी प्रादेशिक अस्पतालका सूचना अधिकारी डा.नेत्र रानाले भने ।

विगतका शीतलहरमा कैयन नागरिकले ज्यान समेत गुमाएका थिए । अहिले त्यस्तो अवस्था आउन नदिन सर्वसाधारणले सरकारसँग माग गरेका छन् ।