कैलालीमा  भन्सारमा  चालू  आर्थिक वर्षको पहिलो छ महिनाको लक्ष्यभन्दा कम राजस्व उठेको छ । आन्तरिक राजस्व भने लक्ष्यअनुसार सङ्कलन भएको छ ।

कैलाली  भन्सार  कार्यालयको  चालू  आर्थिक  वर्षको साउनदेखि  पुससम्म  कुनै  महिनामा  पनि  राजस्व  लक्ष्य  प्राप्त भएको  छैन ।

 अरू  महिनामा  गत  आर्थिक  वर्षको  हाराहारीमा राजस्व सङ्कलन भए पनि असोजमा भने निकै कम राजस्व सङ्कलन भएको छ ।

अघिल्लो  वर्षको  असोजमा  ८२  करोड  पाँच  लाख राजस्व सङ्कलन भएकामा यस वर्षको असोजमा ७७ करोड ४६ लाख मात्रै सङ्कलन भएको छ ।

मूल्य  अभिवृद्धि  कर  र  अन्तःशुल्क  लक्ष्यअनुसार  नै उठे पनि यस नाकाबाट आयात निर्यात घट्दा भन्सार महसुल लक्ष्यअनुसार उठ्न नसकेको प्रमुख भन्सार अधिकृत नरबहादुर थापाले जानकारी दिए।

कैलाली भन्सारबाट छ महिनाको अवधिमा ४० अर्ब ४० करोड  ८१  लाख  ४७  हजार  रुपियाँको  वस्तु  आयात  र  १० करोड ३० लाख ५४ हजार रुपियाँ बराबरको मालवस्तु निर्यात भएको छ । गोरखापत्र दैनिकमा एकिन्द्र तिमिल्सेनाले खबर लेखेका छन् ।