नेपालको व्यापार घाटा ४६.६४ प्रतिशतले बढेको छ ।

चालू आर्थिक वर्षको पहिलो ६ महिनामा भएको यस्तो व्यापार घाटा ८ अर्ब ८० अर्ब ४९ करोड १७ लाख ४७ हजार रुपैयाँ रहेको छ । यस्तो व्यापार घाटा अघिल्लो वर्षको ६ खर्ब ४४ करोड ६१ लाख ८१ हजार रुपैयाँ रहेको थियो । 

भन्सार विभागले सार्वजनिक गरेको तथ्यांक अनुसार चालू आर्थिक वर्षको अर्धवार्षिक तथ्यांक अनुसार करिब १० खर्बको बस्तु आयात भएको छ ।

नेपालमा भएको बस्तु तथा सेवाको आयात नेपालले यो अवधिमा खर्चिएको नौ खर्ब ९९ अर्ब ३४ करोड २७ लाख ८ हजार रुपैयाँ छ ।

यस्तो तथ्यांक गत वर्षको सोही अवधिको भन्दा ५१.१३ प्रतिशतले बढी हो । गत वर्षको सोही अवधिमा नेपालमा ६ खर्ब ६१ अर्ब २४ करोड ५३ लाख ९४ हजार रुपैयाँको वस्तु तथा सेवा आयात भएको तथ्यांकले देखाउँछ ।

यो अवधिमा नेपालको वैदेशिक व्यापार भने ११ खर्ब १८ अर्ब १९ करोड ३८ लाख रुपैयाँको भएको छ । यस्तो वैदेशिक व्यापार अघिल्लो वर्षको सोही अवधिको तुलनामा ५४.८६ प्रतिशतले बढेको छ । गत वर्ष नेपालको यस अवधिसम्मको वैदेशिक व्यापार ७ खर्ब २२ अर्ब ०४ करोड ४६ लाख रुपैयाँको थियो ।

निर्यात ९५ प्रतिशतले बढ्यो

भन्सार विभागको तथ्यांक अनुसार नेपालको निर्यात यो अवधिमा ९५.४८ प्रतिशतले बढेको छ । ६ महिनामा नेपालबाट १ खर्ब १८ अर्ब ८५ करोड ९ लाख ६० हजार रुपैयाँको वस्तु निर्यात भएको छ ।

यस्तो वस्तु निर्यात गत वर्षको सोही अवधिमा ६० अर्ब ७९ करोड ९२ लाख १४ हजार रुपैयाँ थियो । पछिल्लो समय नेपालको निर्यात व्यापारमा सुधार हुँदै गएको छ । नेपालको निर्यात व्यापार चालू आर्थिक वर्षदेखि नै उल्लेख्य सुधार हुँदै गएको पनि तथ्यांकले देखाएको छ ।