मानव अधिकार तथा शान्ति समाजले हिंसा र आपराधिक मार्गलाई बढवा दिने अभिव्यक्ति दिने भौतिक पूर्वाधार तथा यातायात मन्त्री रेणु यादवलाई बर्खास्त गर्न माग गरेको छ ।

माघ ५ गते रौतहटको गौरमा आयोजित कार्यक्रममा मन्त्री यादवले जनमत पार्टीका अध्यक्ष सीके राउतप्रति लक्षित गर्दै २०६३ सालको जस्तै घटना दोहेरिने चेतावनी दिएकी थिइन् । 

समाजका सभापति गोविन्द खनालले आइतवार एक विज्ञप्ति प्रकाशित गरी मन्त्री यादवले हालै रौतहटको गौरमा दिएको  आपत्तिजनक भन्दै उनलाई बर्खास्त गर्न प्रधानमन्त्रीसँग आग्रह गरेका हुन् । 

‘मन्त्री यादवले हालै रौतहटको गौरमा दिएको  आपत्तिजनक अभिव्यक्ति मन्त्री पदको गरिमा बिपरित हुनुका साथै लोकतान्त्रिक  मर्यादाको खिलाफ रहेको धारणा मानव अधिकार तथा शान्ति समाजको रहेको छ । आपराधिक  मार्गलाई बढावा दिने गरी अभिव्यक्ति दिने मन्त्री रेणु यादवलाई तत्काल मन्त्री पदबाट बर्खास्त गर्न प्रधान मन्त्री शेरबहादुर देउवालाई मानव अधिकार तथा शान्ति समाज  आग्रह गर्दछ,’ विज्ञप्तिमा भनिएको छ । 

आयोगले यसैगरी सीके राउत नेतृत्वको जनमत पार्टीबाट  प्रदर्शित कतिपय अराजक, उच्छृंखल एवम अशोभनिय गतिबिधीको पनि निन्दा गरेको छ ।