शिवशिखर बहुउद्देश्यीय सहकारी संस्थाले बाँकेको नेपालगञ्जमा एटीएम सेवा सञ्चालनमा ल्याएको छ । 

आफ्ना सदस्यलाई प्रविधिमैत्री बनाउने र सरल सहज रूपमा वित्तीय सेवा उपलब्ध गराउने उद्देश्यले सहकारीले एटीएम सेवा सञ्चालनमा ल्याएको हो । 

भक्तपुरको कौशलटारमा मुख्य कार्यालय रहेको शिवशिखर बहुउद्देश्यीय सहकारी संस्थाले मुलुकका विभिन्न २४ स्थानमा आफ्ना सेवा केन्द्र विस्तार गरेको छ । 

संस्थाका प्रमुख कार्यकारी अधिकृत (सीईओ) लीलानाथ गौतमका अनुसार आफ्ना सेवा केन्द्र रहेका सबै स्थानमा एटीएम सेवा विस्तार गर्ने संस्थाको योजना छ । 

यस्तो योजना अनुसार नेपालगञ्जमासमेत एटीएम सेवा सञ्चालनमा ल्याइएको उनले बताए । नेपालगञ्जमा सञ्चालनमा ल्याइएको एटीएम शिवशिखर सहकारीको तेस्रो एटीएम काउन्टर भएको पनि उल्लेख छ ।

सोमवार नेपालगञ्ज उपमहानगरपालिकाका मेयर धवलशमशेर राणाले एटीएम सेवाको शुभारम्भ गर्दै सहकारी संस्थाहरूले आधुनिक सेवा सञ्चालन गर्दा शेयर सदस्यहरूलाई वित्तीय कारोबार थप सहज हुने बताए । 

यो महिनाभित्र विभिन्न १३ वटा सेवा केन्द्रमा एटीएम सेवा सञ्चालनमा ल्याइने संस्थाका सीईओ गौतमले बताए । 

शिवशिखर बहुउद्देश्यीय सहकारी संस्थाले मोबाइल एपसमेत सञ्चालनमा ल्याइसकेको छ । हाल मोबाइल एपका ४ हजार भन्दा बढी प्रयोगकर्ता रहेको सहकारीले जनाएको छ । 

यसअघि भक्तपुरको कमलविनायक, कास्कीको पोखरामा एटीएम सेवा सञ्चालनमा आइसकेको छ । उपभोक्ताले शिवशिखर बहुउद्देश्यीय सहकारीको एटीएम प्रयोग गरेर मुलुकका सबै बैंक तथा वित्तीय संस्थाका एटीम काउन्टरबाट पनि वित्तीय सेवा लिन सक्ने छन् । सीईओ गौतमका अनुसार भारतमा समेत यो कार्ड प्रयोगमा ल्याउन सकिने छ । 

उपभोक्ताले किनमेल गर्दा विभिन्न अनलाइन स्टोरहरूलाई समेत शिवशिखरको कार्ड मार्फत रकम भुक्तनी गर्न सक्ने बताइएको छ । 

पश्चिम नेपालको व्यावसायिक हबका रूपमा रहेको नेपालगञ्जको न्यूरोडमा आफ्नै भवनबाट शिवशिखर सहकारीले वित्तीय सेवा सञ्चालन गरिरहेको छ । 

सहकारीले निकट भविष्यमा ई टेलर इ ट्रान्जेक्सनलगायतका सेवा पनि सञ्चालनमा ल्याउने तयारी गरिरहेको जनाएको छ ।