सुन चोरी प्रकरणमा महानगरीय अपराध महाशाखाका एक जना प्रहरी निरीक्षक मुछिएका छन् । 

महाशाखाको ललितपुर परिसरमा कार्यरत प्रहरी निरीक्षक (इन्स्पेक्टर) सानाकान्छा रम्तेलमाथि महाशाखाले समिति बनाएर अनुसन्धान शुरू गरेको हो । 

गोदावरीको एक सुन पसलमा चोरी घटनामा अभियुक्तबाट रकम असुल्न लगाएर आर्थिक लाभ लिएको उनीमाथि आरोप लागेको छ । 

‘सुन सञ्चालकसँग मिलेर अभियुक्तसँग पैसा असुलेर मुद्दा नचलाएको पाइएकाले कानूनी दायरामा ल्याइएको छ,’ महाशाखाका एक अधिकृतले लोकान्तरसँग भने ।

रम्तेलमाथि छानबिन गर्न महाशाखाले प्रहरी नायव उपरीक्षक (डीएसपी)को नेतृत्वमा समिति बनाएर छानबिन गरिरहेको छ । 

केही समयअघि सुन पसलबाट एक जना महिलाले सुन चोरी गरेकी थिइन् । त्यसको अनुसन्धान गरेका रम्तेलले मुद्दा चलाउनुको साटो चोरी बापतको सुन बराबरको पैसा तिराएर घटना सामसुम पार्न खोजेका थिए । 

महाशाखाका अधिकारीका अनुसार उनले त्यो कुरा माथिल्लो निकायलाई पनि जानकारी गराएका थिएनन् ।