कुनै बेला हिट फिल्म दिएका निर्माता, गायक तथा गीतकार डा. भोला रिजाल दुई दशकपछि पुनः चलचित्र क्षेत्रमा फर्किएका छन् । उनी ‘ह्यारीकी प्यारी’ नामक रोमान्टिक कमेडीमार्फत् चलचित्र क्षेत्रमा फर्किएका हुन् । 

चलचित्रको सोमवारबाट पर्वतको भुक देउरालीमा छायाँकन शुरू भएको छ । चलचित्रको निर्देशन स्त्री रोग विशेषज्ञसमेत रहेका डा. रिजालका छोरा दन्त चिकित्सक डा. कपिल रिजालले गर्दैछन् । 

लण्डनको दन्त चिकित्सा क्षेत्रमा साढे दुई दशकदेखि लोकप्रियता कमाउँदै आएका डा. कपिलले लण्डनमै बसेर अंग्रेजी भाषाका सर्ट फिल्महरू गिल्ट, साइलेन्स र कर्मा बनाइसकेका छन् । उनले नेपाल र लण्डनमा गरी एक दर्जन म्युजिक भिडियो निर्देशन गरिसकेका छन् । फिचर फिल्म भने ‘ह्यारीकी प्यारी’ उनको डेब्यू चलचित्र हो । 

निर्देशक डा. कपिलका अनुसार पर्वतका विभिन्न स्थानमा दुई सातासम्म फिल्मको छायाँकन हुनेछ भने बाँकी काठमाडौंमा गरिने छ । 

युनिट पर्वत प्रस्थान गर्नुअघि युनिटका सहभागी सबै कलाकार तथा प्राविधिकको पीसीआर परीक्षण गरिएको र खोप लगाएका कलाकार तथा प्राविधिकलाई मात्र युनिटमा सहभागी गराइएको निर्माण पक्षको दाबी छ । 

छायाँकन शुरू गर्नुअघि जितु नेपाल र विजय बरालले मुहूर्त सट दिएका थिए । 

फिल्ममा जितु ह्यारी र साम्राज्ञी राज्य लक्ष्मी शाह उनको प्यारीका रुपमा देखिनेछन् । 

जितु र साम्राज्ञीका साथमा विजय बराल, लक्ष्मी गिरी, सुवास गजुरेल, नरेश पौडेल, रञ्जना भट्टराई, समीक्षा पौडेल, रमेश अधिकारी, डिल्लीराम खनाललगायतका कलाकारले यसमा अभिनय गर्दैछन् ।

चलचित्र डा. भोला रिजालको बीआर प्रडक्सनको व्यानरमा निर्माण भइरहेको छ । 

फिल्ममा कथा डा. कपिल रिजाल, पटकथा र संवाद सुदीप बराल, गिरीराज घिमिरे, डा. कपिल रिजाल र अभिमन्यू निरवी, गीत डा. भोला रिजाल, संगीत शिखर सन्तोष र युग भुषाल, गायन सपनकुमार राई, सौभर दास, थोम्सन एन्ड्रयुज, मीना निरौला र देवाञ्जली जोशी, कोरियाग्राफी कविराज गहतराज, छायांकन निर्देशन सुदीप बराल र सम्पादन अर्जुन जिसीको रहने निर्माण पक्षले जनाएको छ ।