नेकपा एमाले केन्द्रीय सल्लाहकार परिषद्का अध्यक्ष अमृतकुमार बोहराले वर्तमान सरकार जनतालाई राहत सुविधा दिनुभन्दा एमालेविरुद्ध षड्यन्त्रमा केन्द्रित रहेको आरोप लगाएका छन् ।

मंगलवार प्रेस विज्ञप्ति जारी गर्दै अध्यक्ष बोहराले राज्यका सबै अंगहरू प्रायः अस्तव्यस्त रहेका बताए ।

‘यतिखेर देशमा गठबन्धनको सरकार छ । यो राष्ट्र र जनताको सरोकारका सवालमा ज्यादा अनुत्तरदायी छ । राज्यका सबै अंगहरू प्रायः अस्तव्यस्त छन् । आम जनता महंगीको चर्को मार खेप्न बाध्य छन् । कोरोनाको खोपसम्म राम्ररी दिन सकेको छैन । खोपमा अपचलन भएका कुराहरू आइरहेका छन् । औषधिको नाममा सिटामोलजस्तो सामान्य औषधि समेत नागरिकले राम्ररी पाउन सक्दैनन् । सरकार जनतालाई राहत सुविधा दिनुभन्दा नेकपा एमालेविरुद्ध षड्यन्त्रमा केन्द्रित छ । यस्तो अवस्थामा हामी राजनीतिक तथा वैचारिक रूपमा अझ सजग तथा सक्रिय बन्नु जरुरी छ । विरोधीहरूले फैलाएको भ्रमहरूलाई चिर्दै पार्टीको आन्तरिक एकतालाई सुदृढ पार्न बढी केन्द्रित बन्नुपर्दछ,’ विज्ञप्तिमा उल्लेख छ ।

पार्टी केन्द्रीय कमिटीले केन्द्रीय सल्लाहकार परिषद्को नीतिगत रूपमा गठन गरिसकेकाले अन्योलमा नपर्ने र स्थानीय पार्टी काममा सक्रिय हुन अध्यक्ष बोहराले सबै सल्लाहकारमा आह्वान गरेका छन् ।

‘सल्लाहकार परिषद् विधानबमोजिम पार्टीलाई विभिन्न सल्लाह–सुझाव प्रदान गरेर अघि बढ्न सहयोग गर्ने एक जिम्मेवार निकाय हो । हामी आफ्नो दायित्वप्रति सचेत छौं । यस्तो स्थितिमा परिषद्को जागरुकता, क्रियाशीलता र भूमिकाको खोजी हुनु स्वयंमा महत्वपूर्ण कुरा हो,’ विज्ञप्तिमा उल्लेख छ, ‘अहिले नै बैठक बस्न सम्भव नभएकाले यस पे्रस विज्ञप्तिमार्फत् म सबै कमरेडहरूलाई आग्रह गर्न चाहन्छु, यतिखेर हामीहरू कोरोना जस्तो महामारीबाट विभिन्न रूपबाट आक्रान्त भइरहेका छौं । महामारी फैलिरहेको यो अवस्थामा जमघट, भेला वा बैठकहरू गर्न सम्भव छैन । त्यसो गर्नु स्वयंमा सुरक्षाको दृष्टिकोणले उचित पनि हुँदैन । तसर्थ केही धैर्य गरेर परिस्थिति हेरी छरितो शैलीमा हामी परिषद्को बैठक आयोजना गर्ने तथा परिषद्लाई पूर्णता दिने सोचमा छौं । बैठक तत्काल नबसे पनि नीतिगत रूपमा परिषद्मा रहनुभएका कमरेडहरूले आ–आफ्ना ठाउँमा हुने पार्टीका कार्यक्रमहरूमा स्वास्थ्य सुरक्षाको मापदण्ड बमोजिम भाग लिई आफ्नो दायित्व निर्वाह गर्न आग्रह गर्दछु ।’