नेकपा एमालेबाट फुटेर गएको नेकपा एकीकृत समाजवादी (एस) की उम्मेदवार जयन्ती राईलाई राष्ट्रियसभा सदस्य निर्वाचनमा एमालेकै सांसदले सहयोग गरेका छन् ।

राष्ट्रियसभा निर्वाचनको महिलातर्फ गठबन्धनबाट उम्मेदवार बनेकी नेकपा एकीकृत समाजवादीकी राईले एमालेकै २ सांसदको मत तानेकी छन् । राईलाई प्रदेश सभाका ५२ र स्थानीय तहका १२२ जनप्रतिनिधिले मत दिएका छन् । गठबन्धनमा प्रदेश सभाका ५० सांसद मात्रै छन् । 

गठबन्धनमा कांग्रेसका २१, माओवादीका १५, नेकपा एसका १० र जसपाका ३, संघीय लोकतान्त्रिक राष्ट्रिय मञ्चका १ गरी जम्मा ५० सांसद छन् । 

राईले ४ हजार ६९२ मतभार पाएर विजयी हुँदा नेकपा एमालेकी उम्मेदवार सुमित्रा भण्डारीले ४ हजार ३६२ मत प्राप्त गरेकी थिइन् । प्रदेश सभाका ३८ र स्थानीय तहका १४१ जनप्रतिनिधिले भण्डारीलाई मतदान गरेका छन् ।

भण्डारीलाई एमालेकै २ सांसदले ‘मत दिएनन् । एमालेका ४० सांसद मतदानमा सहभागी भएका थिए ।

राप्रपाकी उम्मेदवार रन्जु प्याकुरेललाई प्रदेश सभाका १ र स्थानीय तहमा ४ जनप्रतिनिधिले मत दिए । उनले १२० मत ल्याएकी थिइन् । उनलाई पनि स्थानीय तहका १ जनप्रतिनिधिको मत थप आएको छ ।

राप्रपाबाट जितेका गौरीगञ्ज गाउँपालिकाका अध्यक्ष बाबुराजा श्रेष्ठ मतदानमा सहभागी भएका थिएनन् ।  राप्रपाको मतभार समेत १२० रहेकोमा १ जना स्थानीय तहका जनप्रतिनिधिको मत उनले तान्न सफल भएकी थिइन् । 

महिलातर्फ स्थानीय तहको ३ मत बदर भएको छ । १ नम्बर प्रदेशमा ३६४ मतदाता थिए । प्रदेशसभा सदस्य ९२ जना र स्थानीय तहको प्रमुख/अध्यक्ष तथा उप्रमुख/उपाध्यक्ष २७२ जना रहेका थिए । ९२ प्रदेशसभा सदस्यको मतभार ४ हजार ४१६ र २७२ स्थानीय तहका जनप्रतिनिधिको मतभार ४ हजार ८९६ गरी जम्मा मतभार ९ हजार ३१२ रहेको थियो ।