सीके राउत नेतृत्वको जनमत पार्टी बुधबारको राष्ट्रियसभा निर्वाचनलाई बिथोल्ने प्रयासस्वरुप तोडफोडमा उत्रिएपछि मधेस प्रदेश सरकार आक्रोशित बनेको छ । मधेस प्रदेश सरकारका प्रवक्ता शैलेन्द्र प्रसाद साहले बुधबार साँझ विज्ञप्ति जारी गरी तोडफोड एवम् हिंसाजन्य गतिविधि प्रति मधेश प्रदेश सरकारको गम्भिर ध्यानाकर्षण भएको जनाएका छन् । साहले संघातिक आक्रमण एवम् सवारी साधनमा गरिएको तोडफोड घटनाको वास्तविक छानविन गरी सम्बन्धित जनप्रतिनिधि एवम् चिकित्सकलाई क्षतिपूर्ति उपलब्ध गराउनका साथै दोषी उपर कार्वाही गर्न सरकारको तर्फबाट तालुक निकायलाई निर्देशन दिएका छन् ।  

‘जनकपुरधाममा राष्ट्रिय सभा सदस्यको निर्वाचनका लागि मतदानमा सहभागी हुन विभिन्न स्थानहरुबाट आउनु भएका जनप्रतिनिधिहरुको सवारी साधनमा जनमत पार्टीका कार्यकर्ताहरुद्वारा गरिएको तोडफोड एवम् हिंसाजन्य गतिविधि प्रति मधेश प्रदेश सरकारको गम्भिर ध्यानाकर्षण भएको छ’, उनको विज्ञप्तमा भनिएको छ, ‘पूर्व घोषित विरोधका कार्यक्रमहरु नरहेको अवस्थामा पनि प्रदेश सभा सदस्य अशोक यादव, हरिवन नगरपालिका मेयर, उपमेयर, जलेश्वर अस्पतालका मेसु डा सतिश साह लगायतका व्यक्तिहरुमाथि गरिएको संघातिक आक्रमण एवम् सवारी साधनमा गरिएको तोडफोड घटनाको वास्तविक छानविन गरी सम्बन्धित जनप्रतिनिधि एवम् चिकित्सकलाई क्षतिपूर्ति उपलब्ध गराउन एवम् दोषी उपर कार्वाही गर्न प्रदेश सरकार तालुक निकायलाई निर्देशित गर्दछ ।’

विज्ञप्तिमा  घाइतेहरुको शिघ्र स्वास्थ्य लाभको कामना गर्दै लोकतान्त्रिक मूल्य र मान्यतामा विश्वास राखि अहिंसात्मक तवरबाट आफ्नो विचार एवम् अभिमत प्रकट गर्न जनमत पार्टीलाई प्रदेश सरकारले आग्रह गरेको छ ।