स्थानीय तहको चुनावको मिति घोषणालाई लिएर राष्ट्रिय रूपमा बहस भइरहेका बेला प्रधानमन्त्री शेरबहादुर देउवाले राष्ट्रपति विद्यादेवी भण्डारीसँग भेटवार्ता गरेका छन् ।

राष्ट्रपति भण्डारीलाई भेट्न प्रधानमन्त्री देउवा बिहीवार दिउँसो शितलनिवास गएका हुन् । 

राष्ट्रपति र प्रधानमन्त्रीबीचको भेट नियमित भएको राष्ट्रपतिका सञ्चार विज्ञ टीका ढकालले लोकान्तरलाई जानकारी दिए ।

‘राष्ट्रपति र प्रधानमन्त्रीबीच नियमित भेटघाट हो, समसामयिक राजनीतिका विषयमा छलफल भयो, निर्वाचनको विषयमा आ–आफ्ना विचार आदानप्रदान भए,’ ढकालले लोकान्तरसँग भने ।  

स्थानीय तहको चुनावको मिति घोषणा गर्न निर्वाचन आयोगले समेत सरकारलाई आग्रह गरेको बेला यसबारे राष्ट्रपति भण्डारीले प्रधानमन्त्रीसँग चासो राखेको स्रोतको दाबी छ ।

वैशाखमा स्थानीय तहको चुनाव नहुँदा उत्पन्न हुनसक्ने संवैधानिक संकटको विषयमा राष्ट्रपतिले प्रधानमन्त्रीको ध्यानाकर्षण गराएको स्रोतले बतायो । चुनावको मितिबारे छलफल गर्न कांग्रेस केन्द्रीय समितिको बैठक शुक्रवार या शनिवार भर्चुअल रूपमा बस्ने तयारी भएको छ ।