राष्ट्रिय   गौरवको आयोजना  गौतमबुद्ध  अन्तर्राष्ट्रिय  विमानस्थल निर्माणको  काम  सकिएको  छ ।

आईसीबी–१  र आईसीवी–२ अन्तर्गतको सम्पूर्ण काम सकिएपछि अब विमानस्थल परीक्षण उडानको पर्खाइमा छ ।

विमानस्थल  विस्तार  परियोजनाका  अनुसार परीक्षण  उडान  जति  चाँडो  हुन  सक्यो,  त्यति  नै चाँडो विमानस्थल सञ्चालनमा आउनेछ । परीक्षण उडानका लागि प्राविधिक जनशक्तिलाई तालिम दिन अहिले अस्ट्रियाका प्राविधिक भैरहवा विमानस्थलमै छन् ।  

त्यस्तै   थाई   प्राविधिकले   पनि   भैरहवा विमानस्थलमै आएर तालिम दिन थालेका छन् । परियोजना   प्रमुख   प्रवेश   अधिकारीका अनुसार  आईसीबी–१    र  आईसीबी–२ अन्तर्गतका सबै काम सकिएकोले अब परीक्षण उडानका  लागि  विमानस्थल  तयारी  अवस्थामा पुुगेको छ ।

परीक्षण उडानको दिन नै आयोजना हस्तान्तरणको  मिति  तय  गरिने  अधिकारीले जानकारी दिए ।

परीक्षण  उडानको  मिति  भने  नागरिक उड्डयन   प्राधिकरणले   तय   गर्नुपर्ने   हुन्छ । भैरहवास्थित गौतमबुद्ध विमानस्थललाई अन्तर्राष्ट्रिय  स्तरको  बनाउन  चिनियाँ  ठेकेदार कम्पनी  नर्थ  वेस्ट  सिभिल  एभिएसन  एयरपोर्ट कन्स्ट्रक्सन  ग्रुपले  पहिलो  चरणको  कामका लागि  अन्तर्राष्ट्रिय  बोलपत्र  (आईसीबी–१)  मा सम्झौता भएर निर्माण कार्य २०७१ माघ १ देखि शुरू गरेको थियो ।

आईसीबी–१  अन्तर्गत  तीन  हजार  मिटर धावनमार्ग,  चारवटा  लिङ्क  ट्याक्सी–वे,  पाँच वटासम्म   अन्तर्राष्ट्रिय   जहाज   पार्किङ   गर्न सक्ने  क्षमताको  जहाज  पार्किङस्थल,  टर्मिनल भवन, प्रशासनिक भवन, कन्ट्रोल टावर, अग्नि नियन्त्रण भवन, पानी ट्याङ्की, तारबार, नाला, पाँच  सय  कार  अटाउने  क्षमता  भएको  कार पार्किङ,  विद्युतीय  काम,  टर्मिनल  विल्डिङको उपकरणसहितको  काम,  ट्याक्सी–वेलगायतका काम  रहेका  थिए,  जुन  अहिले  सबै  निर्माण सम्पन्न भइसकेका छन् । गोरखापत्र दैनिकमा लक्ष्मण पौडेलले खबर लेखेका छन् ।