चीनले भारतसँगको सीमाविवादमा तेस्रो पक्षको हस्तक्षेपलाई विरोध गरेको छ । 

चीनको रक्षा मन्त्रालयले सीमाविवाद चीन र भारतको पारस्परिक विषय भएको बतायो । यस विवादमा दुवै पक्षले तेस्रो देशको हस्तक्षेपलाई विरोध गर्ने चीनको भनाइ छ ।

भारतसँगको सैन्यस्तरीय वार्ता सकारात्मक तथा रचनात्मक भएको चीनको रक्षा मन्त्रालयको कथन छ । 

चीनले छिमेकीहरूलाई धम्क्याउने गरेको भनी अमेरिकाले लगाएको आरोपलाई पनि चीनले खण्डन गरेको छ । सीमाविवादलाई उचित तरिकाले व्यवस्थापन गर्नका लागि भारतसँग मिलेर काम गर्ने उसको भनाइ छ ।

भारत र चीनबीच १४औं चरणको सैन्य वार्ता जनवरी १२ मा भएको थियो । त्यसमा दुवै पक्षले लद्दाखमा गतिरोधको बाँकी मुद्दामा पारस्परिक रूपमा स्वीकार्य समाधानका लागि सैन्य तथा कूटनीतिक माध्यमबाट कुराकानी गर्न सहमति जनाएका थिए । 

चीनको रक्षा मन्त्रालयका वरिष्ठ कर्नेल वु छ्यानले बिहीवारको पत्रकार सम्मेलनमा ह्वाइट हाउसकी प्रेस सचिव जेन साकीको आलोचना गरे । चीनले छिमेकीहरूलाई धम्क्याइरहेको भनी साकीले टिप्पणी गरेकी थिइन् । 

अमेरिकाले चीन भारत मामिलामा हस्तक्षेप गर्न नमिल्ने कर्नेल वुको भनाइ छ ।