राष्ट्रिय प्रजातन्त्र पार्टी (राप्रपा)का उपाध्यक्ष ध्रुवबहादुर प्रधानले पार्टीका निवर्तमान अध्यक्ष कमल थापा पार्टी विभाजन गर्ने पक्षमा नरहेको दाबी गरेका छन् । 

थापाले सोमवार काठमाडौंमा आयोजना गरेको चियापान कार्यक्रममा सहभागी भएका प्रधानले थापा पार्टी एकताकै पक्षमा रहेको बताएका हुन् । 

उनले महाधिवेशनले दिएको जिम्मेवारीलाई वहन गर्दै पार्टीलाई एकताबद्ध बनाएर लैजान आफूहरू प्रतिबद्ध रहेको पनि बताए । 

‘उहाँले पार्टी फुटाउने सोच्नु भएको जस्तो मलाई लागेको छैन, महाधिवेशनले निर्वाचित गरेको हुनाले मेरो दायित्व पार्टीलाई एकताबद्ध बनाएर लैजाने हो,’ उनले भने, ‘त्यो दायित्व निर्वाचित अध्यक्षको पनि हुन्छ, हामी पार्टी एकताको पक्षमा छौँ ।’

पार्टीकी महामन्त्री कुन्ती शाहीले पनि पार्टी विभाजनको पक्षमा पूर्वअध्यक्ष थापा नरहेको बताइन् । उनले पार्टी नेतृत्वले विगतमा पार्टीमा दुःख गरेका कुनै पनि नेता, कार्यकर्तालाई पार्टीभित्र समेटेर लैजानुपर्ने बताइन् । 

‘थापाले पार्टीलाई सशक्त बनाउन देशव्यापी अभियान चलाउने धारणा राख्नु भएको छ,’ उनले भनिन्, ‘विगतमा पार्टीमा योगदान गरेका, दुःख गरेका सबै नेता, कार्यकर्तालाई समेटेर विभाजन आउन नदिन पार्टी नेतृत्व बढी नै सचेत हुनुपर्छ ।’

महामन्त्री शाहीले पार्टीलाई सशक्त बनाउन सबै नेताहरू एकताबद्ध भएर अघि बढ्नुपर्ने आवश्यकता औंल्याइन् । 

निवर्तमान अध्यक्ष थापाले राप्रपा महाधिवेशनमा पूर्वराजा ज्ञानेन्द्र शाहको हस्तक्षेप भएको भन्दै छानबिन गर्नुपर्ने माग गरेका छन् । आफूलाई पार्टीबाट किनारा गर्न खोजिए पार्टी दुर्घटनामा पर्ने पनि चेतावनी दिएका थिए ।