प्रदेश १ सरकारले प्रदेश खेलकुद बोर्डका सदस्य सचिव परशुराम (कृष्ण) बस्नेतलाई सामाजिक विकास मन्त्रालयले स्पस्टीकरण सोधेको छ ।

३ दिनअघि मन्त्री भएका सामाजिक विकासमन्त्री राजन राईले उनलाई मंगलवार स्पष्टीकरण सोधेका छन् ।

भीम आचार्य नेतृत्वको सरकारले बस्नेतलाई खेलकुद बोर्डको सदस्य सचिव नियुक्त गरेको थियो । राजेन्द्र राई नेतृत्वको सरकारले पहिलो क्याबिनेट बैठकबाटै आचार्य नेतृत्वको सरकारले गरेका नियुक्ति खारेज गर्ने निर्णय गरेको थियो ।

सामाजिक विकास मन्त्रालयले बस्नेतलाई हटाउने प्रक्रिया शुरू गरेको जनाइएको छ । 

बस्नेतको नियुक्तिमै प्रश्न उठाउँदै ३ दिनभित्र प्रस्टीकरण पेश गर्न गरी मन्त्री राईले स्पष्टीकरण सोधेका हुन् । मापदण्ड पूरा नगरेको व्यक्तिलाई नियुक्त गरिएको भन्दै बस्नेतलाई स्पष्टीकरण सोधिएको मन्त्रालयले जनाएको छ ।

खेलकुदको क्षेत्रमा कम्तीमा १० वर्षको अनुभव हासिल गरेको हुनुपर्ने, नैतिक पतन देखिने फौजदारी कसूरदार ठहर नभएको हुनुपर्ने, स्वच्छ छवि भएको हुनुपर्ने प्रदेश खेलकुद ऐनमा उल्लेख गरिएको छ ।

बस्नेतको योग्यता नपुगेको र विवादास्पद व्यक्ति भएको भन्दै प्रष्टीकरण सोधिएको मन्त्रालयका एक कर्मचारीले बताए ।