लोकान्तर ‘राउण्ड अप’ मा पाठकलाई स्वागत छ । आज मिति २०७८ साल फागुन ३ गते मंगलबार । बितेको २४ घण्टाका मुख्यमुख्य घटनाक्रमलाई यहाँ प्रस्तुत गरिएको छः

सभामुख अग्निप्रसाद सापकोटाले संसदमा आफू ‘अम्पायर’ मात्रै भएको र निर्णायक भूमिकामा राजनीतिक दलहरू नै रहेका बताएका छन् । सिंहदरबारमा भएको सर्वदलीय बैठक सकेर बाहिरिने क्रममा संक्षिप्त प्रतिक्रिया दिँदै उनले संसद सञ्चालन गराउनेबारे बैठकमा छलफल भएको जानकारी दिए ।

‘बैठकमा प्रस्तुत भएका सबैको धारणालाई गम्भीरतापूर्वक सुनेको छु । सभामुखको हैसियतले स्वतन्त्र हैसियतले निर्णय गर्नुपर्छ । मेरो भूमिका अम्पायरको मात्रै हो । निर्णायक त राजनीतिक दलहरू नै हुन्,’ सापकोटाले भने ।
४ घण्टा चलेको बैठक सजीव, जीवन्त र स्तरीय भएको भन्दै सापकोटाले बैठकमा एमसीसीदेखि संसदमा विचाराधीन रहेको विधेकसम्म विस्तृतमा छलफल भएको जानकारी दिए ।

बैठकमा प्रधानमन्त्री तथा नेपाली कांग्रेस सभापति शेरबहादुर देउवा, नेकपा माओवादी केन्द्र अध्यक्ष पुष्पकमल दाहाल प्रचण्डलगायत विभिन्न राजनीतिक दलका प्रतिनिधिहरूको सहभागिता थियो । बैठकमा नेकपा एमालेको भने उपस्थित भएन । यसअघिका सर्वदलीय बैठक पनि एमालेले बहिष्कार गर्दै आएको थियो ।
००००
सापकोटाले बोलाएको सर्वदलीय बैठकमा मिलेनियम च्यालेन्ज कर्पोरेसनसँगको सम्झौताबारे विस्तृतमा छलफल भएको थियो । बैठकमा सभामुख सापकोटाले एमसीसी अघि बढाउन सहयोग गर्ने संकेत गरेको बैठकमा सहभागी नेताहरूले बताएका छन् ।
बैठकमा एमसीसीबारे विस्तृतमा छलफल भएको नेपाली कांग्रेसकी सचेत पुष्पा भुसालले बताइन् । ‘एमसीसीबारे सबै कोणबाट दलका प्रतिनिधिहरूले कुरा राख्नुभएको छ । एमसीसीबारे विस्तृतमा छलफल भयो,’ उनले भनिन्, ‘एमसीसी बाहिरभन्दा पनि सदनको छलफलको विषय बन्नुपर्छ । सदनभित्रैबाट निर्णयार्थ अघि बढाउनुपर्छ भन्नेबारे छलफल भएको छ ।’
००००
प्रमुख प्रतिपक्षी दल नेकपा एमालेले निलम्बनमा परेका प्रधानन्यायाधीश चोलेन्द्र शमशेर जबरालाई बोकेर हिँड्ने पार्टीको नीति नभएको प्रस्ट पारेको छ ।
चुनाव सार्ने नियतले महाभियोगको कुरा आएकाले विरोध गर्नुपरेको एमालेले बताएको छ ।
सोमवार बसेको एमाले संसदीय दलको बैठकमा अध्यक्ष केपी शर्मा ओलीले परमादेशको नेतृत्व गरेका चोलेन्द्रलाई बोक्ने पार्टीको नीति नभए पनि गठबन्धनको गलत नियतको विरोध गर्नुपरेको बताएका हुन् । आवश्यक पर्दा सडक र कानूनी क्षेत्रबाटै प्रतिवाद गरिने उनले बताए ।
००००
यस्तै ओलीले विवादको भूमरीमा परेको अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्टबारे आफूहरू पर्ख र हेरको नीतिमा रहेको बताएका छन् । एमसीसीबारे निर्णय गर्नुपर्दा आफूहरू राष्ट्रहितको पक्षमा उभिने उनले बताए ।
००००
यता नेकपा एमालेले सर्वोच्चका ४ न्यायाधीशविरुद्ध महाभियोग लगाउने तयारी थालेको बताइएको छ । तर यसबारे सोमबारको संसदीय दलको बैठकले यस विषयमा कुनै निर्णय नभएको प्रस्ट पारेको छ ।
पार्टी संसदीय दलको बैठकपछि सञ्चारकर्मीहरूलाई प्रतिक्रिया दिँदै एमाले प्रमुख सचेतक विशाल भट्टराईले न्यायाधीशहरूलाई महाभियोग लगाउने भनेर गरिएको चर्चा पूर्वानुमानका आधारमा मात्रै आएको बताए ।

उनले संविधान, कानून र परिस्थिति विचार गरेर नेतृत्वले उचित निर्णय लिने बताए । एमालेले खाली काजगमा सांसदहरुको हस्ताक्षर भने संकलन गरेको छ । सत्तारुढ दलका सांसदले प्रधानन्यायाधीश चोलेन्द्र शमशेर जबराविरुद्ध महाभियोग लगाएपछि एमालेले पनि न्यायाधीशहरुविरुद्ध काउन्टर महाभियोग ल्याउन लागेको चर्चा छ । यस्तै सभामुख पनि एमालेको निशानामा छन् ।
००००
यता नेपाली कांग्रेसका वरिष्ठ नेता रामचन्द्र पौडेलले सर्वोच्च अदालतका चार न्यायाधीशविरुद्ध प्रमुख प्रतिपक्ष दल एमालेले महाभियोग प्रस्ताव ल्याउन नमिल्ने टिप्पणी गरेका छन् । पौडेलले एमालेले संसद विघटनको मुद्दामा आफूलाई हराएबापत सर्वोच्च अदालतको निर्णय विपरीत सो महाभियोग प्रस्ताव ल्याउन नमिल्ने तर्क गरेका हुन् ।  सोमवार काठमाडौंमा आयोजित एक कार्यक्रमपछि सञ्चारकर्मीहरूले राखेका जिज्ञासाको जवाफ दिने क्रममा उनले सर्वोच्च अदालतको निर्णय अन्तिम हुने र त्यसलाई चुनौती दिने गरी एमालेले कुनै पनि न्यायाधीशविरुद्ध संसदमा महाभियोग प्रस्ताव ल्याउन नमिल्ने बताए ।
००००
नेकपा एमालेका नेता भीम रावलले एमसीसीको बारेमा एमालेले राष्ट्रिय स्वाधिनता र हितको पक्षपोषण गर्दै स्पष्ट धारणा सार्वजनिक गर्नुपर्ने माग गरेका छन् ।
सोमवार भएको संसदीय दलको बैठकमा उनले एमसीसी सम्झौताबारे संसदीय दलमा गम्भीर छलफल गर्न कार्यसूची तय गर्न माग गरेका हुन् ।
००००
प्रधानन्यायाधीशविरुद्ध महाभियोगको प्रस्ताव दर्ता गरेपछि नेपाली कांग्रेसले संसदीय दलको बैठक बोलाएको छ ।
मंगलवार बिहान ९ बजे नयाँ बानेश्वरस्थित संसद् भवनको ल्होत्से हलमा दलको बैठकका लागि बैठक तय भएको सांसद भीमसेनदास प्रधानले जानकारी दिए ।
००००
पछिल्लो २४ घण्टामा ७४७ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ८ हजार ६९६ नमूना परीक्षणमध्ये ४८२ पीसीआर र २६५ जनामा एन्टिजेन पोजिटिभ देखिएको हो । यस्तै पछिल्लो २४ घण्टामा संक्रमणबाट ८ जनाको मृत्यु भएको छ । हालसम्मको मृत्यु संख्या ११ हजार ९०० छ ।  मन्त्रालयका अनुसार थप २३१९ जना संक्रमणमुक्त भएका छन् ।
००००
आइतवार १०० अंकभन्दा बढीले घटेको शेयर बजारको मापक सूचक नेप्से सोमवार भने झिनो अंकले बढेको छ । आइतवार २७०० बिन्दुमा झरेको नेप्से सोमवार ०.०८ अंकले बढेको हो । सोमवार १२३ कम्पनीको शेयर मूल्य बढ्दा ८९ कम्पनीको मात्रै घटेको छ । सोमवार सबैभन्दा बढी कमाउनेमा भने बुद्धभूमि नेपाल हाइड्रोपावर कम्पनीका लगानीकर्ता छन् ।
००००
सशस्त्र प्रहरी बल नेपालको प्रवक्ताको जिम्मेवारी कामु सशस्त्र प्रहरी वरिष्ठ उपरीक्षक कमलप्रसाद तिउसिनालाई दिइएको छ ।
००००
वैवाहिक बलात्कारको कसूरमा उच्च अदालत दिपायलले अछामका एक पुरुषलाई ३ बर्ष ६ महिना कैद सजाय सुनाएको छ। विवाहित गर्भवती श्रीमतीलाई कुटपिट र यातना दिई जबरजस्ती करणी समेत गरेको ठहर गर्दै उच्च अदालत दिपायलका कामु मुख्य न्यायाधीश टेकनारायण कुँवर र न्यायाधीश जगत बहादुर थापाको इजलासले सो फैसला सुनाएको हो ।
 बहुविवाह गरेपछि प्रहरीमा जाहेरी दिई कारवाही गराएको भनी प्रतिवादले विवाहित गर्भवती श्रीमतीलाई कुटपिट र यातना दिई जबरजस्ती करणी समेत गरेको आरोप लागेको थियो ।
००००
स्वास्थ्यमा सुधार आएपछि संस्कृतिविद् एवं शताब्दी पुरुष सत्यमोहन जोशी उपचार गरी अस्पतालबाट घर फर्किएका छन् । ललितपुरको ग्वार्कोस्थित किष्ट अस्पतालमा गत साता भर्ना भएका जोशी सोमबार पाटनस्थित निवासमा फर्किएको उनका भतिज अजर जोशीले जानकारी दिए।