एमसीसीबारे जनता समाजवादी पार्टी (जसपा) अझै अनिर्णित छ ।

जसपाका सांसद इस्तियाक राईले भने अहिले तत्काल जसपा एमसीसीको विपक्षमा नै रहने बताएका छन् । 

गठबन्धनमा रहेका नेकपा माओवादी केन्द्र र नेकपा एकीकृत समाजवादीले पहिले आफ्नो कित्ता प्रष्ट पार्नुपर्ने उनको भनाइ छ । 

'राष्ट्रवादी भनिने माओवादी र नेकपा (एस)ले आफ्नो पोजिसन क्लियर गरोस् त्यसपछि मात्र जसपाले एमसीसीको विषयमा आफ्नो धारणा बनाउँछ,' राईले लोकान्तरसँग भने, 'अहिलेसम्मको परिस्थितिअनुसार जसपा एमसीसीको विपक्षमा नै रहने देखिएको छ । पार्टीले त्यस विषयमा हालसम्म कुनै औपचारिक निर्णय नगरे पनि मतदान गर्नुपर्ने अवस्थामा विपक्षमा नै मतदान गर्ने निर्णय हुने प्रवल सम्भावना छ ।'

त्यसै गरी जसपाकी सांसद रेणु यादव भने अध्यक्ष उपेन्द्र यादव जनकपुर गएका कारण त्यस विषयमा कुनै निर्णय नभएको बताएकी छन् । 'आज संसदमा एमसीसीको प्रस्ताव टेबुल मात्र हुने हो,' भौतिक पूर्वाधार तथा यातायात मन्त्री समेत रहेकी यादवले भनिन्, 'अध्यक्षज्यु जनकपुरबाट आएपछि एमसीसीको विषयमा के गर्ने भन्ने औपचारिक निर्णय हुन्छ ।'

जसपाका संघीय परिषद् अध्यक्ष डा. बाबुराम भट्टराई एमसीसीको पक्षमा वकालत गर्दै आएका छन् । कार्यकारिणी अध्यक्ष उपेन्द्र यादव भने विपक्षमा देखिएका छन् ।