मिलेनियम च्यालेन्ज कर्पोरेसन (एमसीसी)सँगको सम्झौता संसदबाट अनुमोदन भएपछि नेकपा माओवादी केन्द्रका अध्यक्ष पुष्पकमल दाहाल प्रचण्डले आफ्नो धारणा सार्वजनिक गर्ने भएका छन् ।

सोमबार दिउँसो ३ बजे सोसल मिडिया फेसबूकमार्फत प्रचण्डले आफ्नो धारणा सार्वजनिक गर्न लागेको उनका स्वकीय सचिव रमेश मल्लले जानकारी दिएका छन् । 

प्रचण्डले समसामयिक परिस्थितिबारे जनतामाझ आफ्नो कुरा राख्न लागेको मल्लले बताए ।

एमसीसी संसदबाट अनुमोदन गराउने विषयमा माओवादी केन्द्रभित्र मतभेद थियो । माओवादी केन्द्रले शुरूमा यथास्थितिमा एमसीसी अनुमोदन गर्न नहुने तर्क गरेर विपक्षमा मत हाल्ने निर्णय गरेको थियो ।

तर, कांग्रेसले एमालेसँग सहकार्यका लागि पहल गरेपछि एमाले फेरि शक्तिमा आउन सक्ने भयका कारण माओवादी केन्द्र व्याख्यात्मक घोषणा गरेर एमसीसी अनुमोदन गराउन तयार भएको थियो । 

आइतवारको संसद् बैठकले व्याख्यात्मक घोषणासँगै एमसीसी अनुमोदन गरेको छ । 

तर, माओवादी केन्द्रभित्र भने नेताहरूमा एमसीसी अनुमोदनको विषयमा व्यापक असन्तुष्टि रहेको छ ।

नेताहरू नारायणकाजी श्रेष्ठ, लीलामणि पोखरेल, गिरिराजमणि पोखरेल, देव गुरुङ लगायतले एमसीसी अनुमोदन गर्न नहुने तर्क गरेर बैठकमा मतभेद राखेका थिए ।