नेकपा एमालेका अध्यक्ष केपी शर्मा ओलीले राज्यका अंगहरू आफ्नो पार्टीविरुद्ध प्रयोग भएको आरोप लगाएका छन् । उनले सर्वोच्च अदालतका न्यायाधीशहरूले संविधानभन्दा पनि व्यक्तिका उद्देश्य हेरेको आरोप समेत लगाए । 

अन्तर्राष्ट्रिय महिला दिवसका अवसरमा मंगलवार अनेमसंघले काठमाडौंमा आयोजना गरेको कार्यक्रमलाई सम्बोधन गर्दै ओलीले सरकार, अदालत, संसद् र निर्वाचन आयोगलगायत राज्यका अंगहरू एमालेविरुद्ध प्रयोग भएको आरोप लगाएका हुन् । 

‘राज्यका अगंहरू नेकपा एमाले विरुद्ध प्रयोग भइरहेका छन् । अदालत प्रयोग भएर परमादेशमार्फत सरकार ढाल्ने काम भयो । सभामुखका तर्फबाट स्वेच्छाचारिता र मनपरितन्त्र चलिरहेको छ । कसैको नेताले गरेका निर्णय कार्यान्वयन गर्ने, कसैको पार्टीको केन्द्रीय कमिटीले गरेका निर्णय कार्यान्वयन नगरेर कम्युनिस्ट पार्टीको सरकार ढाल्ने र दक्षिणपन्थीको पाउ मोल्नेलाई कारवाही भएन,’ ओलीले भने, ‘सभामुख हाम्राविरुद्ध, अदालत र संसद् हाम्राविरुद्ध प्रयोग गरे, सरकार त छँदैछ । मेयर मुद्दा जितेर, प्रधानमन्त्री मन्त्री मुद्दा जितेर बन्ने कस्तो जमाना आयो ? कस्तो लोकतन्त्र हो ?’ 

ओलीले अदालतका न्यायाधीशहरूले संविधान नहेरी व्यक्तिको अनुहार र उद्देश्य हेरेर फैसला गर्न थालेको टिप्पणी गरे ।

‘श्रीमानहरूले संविधान हेर्न छाड्नुभयो, उहाँहरूले मुख हेर्न थाल्नुभयो । मान्छेका उद्देश्य हेर्न थाल्नुभयो,’ ओलीले भने । 

ओलीले सर्वोच्च अदालतबाट भएको परमादेश जनादेशबाट सच्याउन सकिने भन्दै तयारीमा लाग्न महिला नेतृहरूलाई आग्रह गरे ।