पूर्वप्रधानमन्त्री एवं प्रमुख प्रतिपक्षी दल नेकपा एमालेका अध्यक्ष केपी शर्मा ओलीले देशको अर्थतन्त्रको भयावह अवस्थाबारे सरकार गम्भीर नभएको आरोप लगाएका छन् । अर्थ मन्त्रालय र राष्ट्र बैँकबीच तालमेल नहुँदा अर्थतन्त्र नाजुक अवस्थामा पुगेको उनको भनाइ छ । 

नेकपा एमालेको उद्योग विभागले आइतवार काठमाडौंमा आयोजना गरेको अन्तक्रिया कार्यक्रममा ओलीले देशको अर्थतन्त्रको ताजा अवस्थाबारे श्वेतपत्र जारी गर्न माग गरेका हुन् । अर्थतन्त्रलाई थप बिग्रन नदिन आफूहरुले हस्तक्षेपकारी भूमिका खेल्ने ओलीले बताए ।

‘देशको अर्थतन्त्र भयावह र नाजुक अवस्थामा छ, सरकारको ध्यान विकासतिर छैन, चिन्ता गर्ने ठाउँले चिन्ता गरेन, घना बादल लागेको बेला समुद्रको माछा आँगनमा वर्षिन्छ । शेरबहादुरजीलाई आगनमा माछा पर्यो । न समुन्द्र न खोला तरपनि माछा पर्छ । प्रधानमन्त्रीलाई अरु कुराको चिन्ता छैन, आँगनमा खसेको माछा घैलामा लाग्नु भएको छ । भगवानले पारिदिएको, परमादेशले पारिदिएको माछाको चिन्ता छ ।’

सरकारलाई देशको अर्थतन्त्रको चिन्ता भएको भए चार महिनामा एकपटक बस्नु पर्ने राष्टिय समस्या समाधान समितिको बैठक राखिनु पर्ने ओलीको सुझाव छ । ‘सरकार अहिले पनि देशको अर्थतन्त्र चुस्त दुरुस्त छ भनेर भनिरहेको छ । अर्थतन्त्रलाई क्यान्सर लागिसक्यो, बायेप्सीको रिर्पोट आइसक्यो । तरपनि सरकार अर्थतन्त्र ठीकठाक छ भनिरहेको छ’ ओलीले भने । 

कमिसनमा कुरा नमिलेका कारण निर्माण व्यवसायीले काम सम्पन्न गरेर पनि पैसा नपाएको उनले गम्भीर आरोप लगाए । ‘कमिसनको राशिमा कुरा नमिलेकोले काम सम्पन्न गरेर पनि ठेकेदारले पैसा पाएका छैनन्, उनीहरु बोल्न सकिरहेका छैनन्’ ओलीले भने । 

सरकारको उपस्थिती कमजोर बन्दा विदेशी मुद्राको अपचलन भइरहेको ओलीले आरोप लगाए ।