वर्षाैं बितिसक्दा समेत बाटो नबनेको र धुलोले खपिनसक्नु भएको भन्दै ललितपुर हरिसिद्धिका स्थानीय वासिन्दा ठेकेदारविरुद्ध आन्दोलनमा उत्रिएका छन् ।

स्थानीयले शुक्रवार बिहानैदेखि सडक अवरुद्ध गरेर आन्दोलनमा उत्रिएका हुन् ।

सातदोबाटो–गोदावरी सडकखण्ड अन्तर्गत हरिसिद्धीको ४०० मिटर बाटो कालोपत्रे हुन सकेको छैन । 

ठेकेदारको लापरवाहीका कारण धुलोले बस्न नसकिएपछि आन्दोलनमा उत्रिएकोे स्थानीयले बताएका छन् । स्थानीयले बाटो पिच नहुँदासम्म गाडी चल्न नदिने जनाएका छन् ।

स्थानीयको विरोधका कारण शुक्रवार बिहानैदेखि त्यसक्षेत्रमा गाडी चल्न सकेका छैनन् । स्थानीय श्याम महर्जन भन्छन्, ‘जहिल्यै आलटाल मात्र गर्ने, पिच हुने समय परपर मात्र सारेर हामीलाई धुलो खुवाइरहेकाले हामीले बन्द गर्नुपरेको हो ।’

अर्का एक स्थानीय भन्छन्, ‘धुलो त हामीले कति खायौंखायौं, हामीलाई धेरै समस्या भएर नै बन्द गर्नुपरेको हो । जबसम्म सडक कालोपत्रे हुँदैन, तबसम्म यो सडक बन्द हुन्छ ।’
 
नगरपालिकाले सडकमा धुलो नउडोस् भन्नका लागि पानी छ्याप्ने गरेकोमा पिच गर्न ठिक्क पारेको सडकमा पानी छ्याप्दा मापदण्ड अनुसार पिच नहुने र संरचना बिग्रने भन्दै ठेकेदारले पानी छ्याप्न नदिएको हो ।

स्थानीयको विरोधपछि २८ नम्बर वडाका अध्यक्ष राजेश महर्जनले तत्काल काम सम्पन्न गर्न सडक निर्माणको जिम्मा पाएको ठेकेदारलाई चेतावनी दिएका छन् । ‘यो सडक हेरिरहेका इन्जिनीयरले चैत्र १७ गतेसम्म अलकत्रा छर्केर भए पनि धुलो नियन्त्रण गर्ने बताएका छन्,’ वडाध्यक्ष महर्जनले भने ।