नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले ऊर्जामन्त्री पम्फा भुसाल र विद्युत प्राधिकरणका कार्यकारी निर्देशक कुलमान घिसिङको प्रयासले नेपाल तीव्र विद्युतीकरणमा गएको भन्दै प्रशंसा गरेका छन् । 

बुधवार गृहजिल्ला चितवनमा नवनिर्मित सबस्टेसनको उद्घाटन गर्दै प्रचण्डले छोटो अवधिमा नै चरम लोडसेडिङको अवस्थाबाट विद्युत निर्यात गर्ने अवस्थामा पुगेको र ऊर्जा क्षेत्रमा जस्तै प्रतिबद्ध भएर काम गरे देश विकास गर्न धेरै समय नलाग्ने प्रमाणित गरेको बताएका हुन् । 

प्रचण्डले भने, ‘लोडसेडिङमुक्त देश मात्रै होइन, अब त विद्युत सरप्लस ! धेरै विद्युत हुने र विदेशसम्म बेच्न मिल्ने अवस्थासम्म देश आइपुग्यो । अब यातायात, चुलोचौको, सिँचाइ पनि विद्युतबाट र सबै चिज विद्युतबाट गर्नेतिर यो देश अगाडि बढ्दैछ ।’

माओवादी केन्द्रको नेतृ पम्फा भुसाल ऊर्जामन्त्री भएपछि कमजोर आर्थिक अवस्था भएकाहरूका लागि निःशुल्क विद्युत दिने घोषणा गरेको भन्दै उनले तारिफ गरेका थिए ।

विद्युत प्राधिकरणमा कुलमान घिसिङलाई ल्याउने निर्णयमा गर्व लागेको पनि उनले सुनाएका थिए । ‘हामीले लिएको निर्णयप्रति पनि गर्व गर्दछु । यो क्षेत्रमा योगदान पुर्‍याउने सबैलाई धन्यवाद,’ प्रचण्डले भने । 

ऊर्जामन्त्री पम्फा भुसाल र विद्युत प्राधिकरणका कार्यकारी निर्देशक उपस्थित रहेको कार्यक्रममा प्रचण्डले उनीहरूकै तारिफ गरेका थिए । 

प्रचण्डले भने, ‘जसरी ऊर्जा मन्त्रालयअन्तर्गतको विद्युत प्राधिकरणले विद्युत उत्पादनसँगको कामलाई प्रगति गर्‍यो । सबै मन्त्रालयले त्यसरी नै काम गर्ने हो भने यो देश बनाउन धेरै वर्ष लाग्दो रहेनछ ।’