अख्तियार दुरूपयोग अनुसन्धान आयोगले रामेछापको लिखु तामाकोशी गाउँपालिकाका अध्यक्ष गोविन्दबहादुर खड्कासहित २७ जनाविरुद्ध भ्रष्टाचार मुद्दा दायर गरेको छ ।

गाउँपालिकामा विद्युतीकरण गर्दा ४ करोड २१ लाख रुपैयाँ हिनामिना गरेको अभियोगमा अध्यक्ष खड्काविरुद्ध बिहीवार विशेष अदालतमा भ्रष्टाचार मुद्दा दायर गरेको अख्तियारका प्रवक्ता श्यामप्रसाद भण्डारीद्वारा जारी विज्ञप्तिमा जनाइएको  छ।

अध्यक्ष खड्काका अलावा गाउँपालिकाका तत्कालीन प्रमुख प्रशासकीय अधिकृतहरू राजुप्रसाद न्यौपाने र टंकप्रसाद चौलागाईं, लेखापालहरू तथा विभिन्न उपभोक्ता समितिका अध्यक्ष तथा पदाधिकारी गरी २७ जनालाई विपक्षी बनाइएको छ ।

गाउँपालिका अध्यक्ष खड्काले खरिद समिति नबनाई मिलेमतोमा आफू अनुकूल उपभोक्ता समिति बनाएर कामको जिम्मा दिएको तथा अनुगमन एवं प्राविधिक नापजाँचका क्रममा समेत मिलेमतो गरेको खुलेको छ ।

अध्यक्ष खड्काविरुद्ध ४ करोड २१ लाख ७०६ रुपैयाँ बिगो कायम गरिएको छ ।

अध्यक्ष खड्काका अलावा तत्कालीन प्रमुख प्रशासकीय अधिकृत राजुप्रसाद न्यौपानेविरुद्ध १ करोड १२ लाख ८२ हजार १७८ रुपैयाँ र तत्कालीन लेखापाल दुर्गाबहादुर डिम्दोङ तामाङविरुद्ध १ करोड २६ लाख ७५ हजार ५०३ बिगो कायम गरिएको छ ।

त्यसैगरी उपभोक्ता समितिका अध्यक्ष बेतबहादुर पुवाँ, कोषाध्यक्ष ममिता श्रेष्ठ र सचिव सुब्बा थापा मगरविरुद्ध ३५ लाख २ हजार ६१४ रुपैयाँ बिगो कायम गरिएको छ।

अर्को उपभोक्ता समितिका अध्यक्ष सुनबहादुर तामाङ, कोषाध्यक्ष करिश्मा परियार र सचिव दलबहादुर तामाङविरुद्ध ३७ लाख ८६ हजार ९०२ रुपैयाँ बिगो कायम गरिएको छ ।

यस्तै अर्को उपभोक्ता समितिका अध्यक्ष होमबहादुर महत, कोषाध्यक्ष अनिता श्रेष्ठ र सचिव डिल्लीबहादुर सुनुवारविरुद्ध ४२ लाख ३५ हजार ६८६  रुपैयाँ बिगो कायम गरिएको छ ।

यसका अलावा​ पाइक कन्स्ट्रक्सन प्रालिका सञ्चालक अमृतबहादुर तामाङविरुद्ध ४२ लाख ३५ हजार ६८६  रुपैयाँ बिगो कायम गरिएको छ ।

हेर्नुहोस्, अख्तियारको विज्ञप्ति :