राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले २०४६ सालयता व्यवस्था परिवर्तन भए पनि जनताको अवस्थामा कुनै परिवर्तन नभएको बताएका छन् ।

राप्रपा जिल्ला कार्यसमितिद्वारा आयोजित बृहत् आमसभा तथा पार्टी प्रवेश कार्यक्रममा उनले मुलुकमा जताततै भ्रष्टाचार, बेरोजगारी, अशिक्षाले जरो गाडिसकेको हुँदा त्यसलाई परिवर्तन गर्न लागि अब ठीक पार्टी एवं ठीक नेतालाई मत हाल्न सबैलाई अपिल समेत गरे ।

अर्थतन्त्रले मुलुक टाट पल्टने अवस्थामा रहे पनि भ्रष्ट नेता र कालोबजारी गर्नेहरू नै धनी भएको भन्दै अध्यक्ष लिङ्देनले उनीहरूको सम्पत्ति पनि छानबिन गर्नुपर्ने बताए ।

कार्यक्रममा राप्रपाका पूर्व अध्यक्ष पशुपति शम्शेर राणाले ९४ प्रतिशत सनातन हिन्दू धर्म रहेको नेपालमा धर्म निरपेक्ष राष्ट्र घोषणा गरी हिन्दूहरूको अपमान गरेको आरोप लगाए । उनले नेपाललाई हिन्दू राष्ट्र घोषणा गर्नका लागि कुनै कसर बाँकी नराख्ने प्रतिबद्धता समेत व्यक्त गरे ।

फरक प्रसङ्गमा जबराले तराई मधेशको यावत समस्या समाधान राप्रपाले नै गर्ने जानकारी दिए । कार्यक्रममा विभिन्न पार्टी छाडेका सयौं कार्यकर्तालाई रापप्रा पार्टी प्रवेश गराइएको थियो ।

नव प्रवेशीलाई अध्यक्ष लिङ्देनले टीका लगाएर पार्टी प्रवेश गराएका थिए ।