अमेरिकाका परराष्ट्रमन्त्री एन्टोनी ब्लिन्केनले रुससँग हतियार नकिन्न सबै देशलाई आह्वान गरेका छन् । 

भारतका रक्षा र विदेशमन्त्रीसँगको दुई जोड दुई वार्तापछि ब्लिन्केनले यस्तो बयान दिएका हुन् । 

‘युक्रेनमा चलिरहेको युद्धलाई विचार गर्दै हामी सबै मुलुकलाई रुसी हतियार प्रणालीको नयाँ कारोबार नगर्न आग्रह गर्छौं,’ ब्लिन्केनले बताए । 

भारतले रुससँग एस–४०० एयर डिफेन्स सिस्टम किनेकाले उसमाथि अमेरिकाले प्रतिबन्ध लगाउन सक्ने विषयमा गरिएको प्रश्नमा ब्लिन्केनले यस्तो जवाफ दिएका हुन् । 

‘हामीले काट्सा कानूनअन्तर्गत भारतमाथि सम्भावित प्रतिबन्ध वा छुटका विषयमा ठोस निर्णय लिइसकेका छैनौं,’ ब्लिन्केनले बताए । 

भारत र रुसबीच सैन्य उपकरण खरिदबिक्रीको लामो इतिहास रहेको उनले स्वीकार गरे । 

‘हामी भारतसँग सहकार्य गर्न असमर्थ र अनिच्छुक रहेको बेलामा भारतले रुससँग सहकार्य गरेको थियो । तर अहिले हामी भारतसँग सहकार्य गर्न इच्छुक र समर्थ दुवै छौं,’ उनले बताए । अमेरिका भारतको सुरक्षा सहयोगी बन्न चाहेको ब्लिन्केनको भनाइ छ ।