शहरी विकास मन्त्री रामकुमारी झाँक्रीको गृहजिल्ला गुल्मीमा पालिका प्रमुख तथा अध्यक्ष पद नेकपा एकीकृत समाजवादीको भागमा नपर्ने देखिएको छ ।

३० गते हुने स्थानीय तहको निर्वाचनमा मन्त्री झाँक्रीको पार्टी नेकपा (एस)ले गठबन्धनबाट प्रमुख वा पालिका अध्यक्ष पद नपाउने भएको हो ।

एसले दुईवटा पालिकामा उपप्रमुख/उपाध्यक्ष पद भने पाएको छ ।

जिल्लाका १२ मध्ये ९ स्थानीय तहमा भागबण्डा टुंगिँदा माओवादीले ४ स्थानीय तहमा प्रमुख वा अध्यक्ष पदमा उम्मेदवारी दिने भएको छ ।

कांग्रेसको भागमा ५ वटा स्थानीय तह परिसकेको छ भने अन्य ३ वटामा कुरा मिल्न बाँकी छ ।

कांग्रेसले मुसिकोट नगरपालिका प्रमुखमा नारायण सापकोटा, ईश्मा गाउँपालिकामा भोजसिंह खड्का, गुल्मीदरबार गाउँपालिकामा सरोज थापा, छत्रकोट गाउँपालिकामा अनन्त पौडेल र कालिगण्डकीमा बेदबहादुर थापालाई अध्यक्ष पदको उम्मेदवार बनाउने पक्का भएको कांग्रेसका जिल्ला सभापति खिलध्वज पन्थीले बताए । रेसुङ्गा नगरपालिकामा भोलि टुङ्गो लाग्ने उनले बताए । 

गठबन्धनको तर्फबाट माओवादीको भागमा परेका मालिका गाउँपालिकामा देवीराम अर्याल, रुरुक्षेत्र गाउँपालिकामा यदु ज्ञवाली, सत्यवती गाउँपालिकमा पारिश्वर ढकाल उम्मेदवार बन्दैछन् ।

चन्द्रकोट गाउँपालिकमा पनि माओवादीले पाउने सहमति भए उम्मेदवारको नाम भने नआएको पन्थीले बताए ।

‘हामीले हिजोको मतभार, अहिलेको मतभार र ती ठाउँमा योगदानको आधारमा अध्यक्षको भागबण्डा गरेका हौं,’ सभापति पन्थीले भने, ‘नेकपा (एस)लाई यसपालि प्रमुख वा अध्यक्ष भाग परेको छैन ।’

मुसिकोट र छत्रकोटमा नेकपा (एस)ले उपप्रमुख/उपाध्यक्ष पाएको छ । मदाने गाउँपालिका र धुर्कोट गाउँपालिकामा टुङ्गो लगाउन बाँकी छ  ।

ईश्मा गाउँपलिकामा नेकपा (एमाले)का लक्ष्मणबहादुर विष्टले ५ हजार ५५ मत ल्याएर अध्यक्षमा निर्वाचित भएका थिए भने नेपाली कांग्रेसका चन्द्रबहादुर महतले ४ हजार मत ल्याएका थिए ।

यसपालि ईश्मामा नेपाली कांग्रेसले भोजराज सिंहलाई अगाडि सारेको छ । 

कालिगण्डकी गाउँपालिकामा नेपाली कांग्रेसका बेदबहादुर थापाले ४ हजार २९८ मत ल्याएर एमालेका टीकाराम ढकाललाई हराएका थिए । यसपालि पनि गठबन्धनले उनैलाई दोहोर्‍याउने भएको छ ।

गुल्मी दरबारमा नेपालीका कांग्रेसका अशोककुमार थापाले ५ हजार ५७५ मत ल्याएर एमालेका कुष्णबहादुर भुसाललाई हराएका थिए । तर यसपालि सरोज थापा कांग्रेसको उम्मेदवार बन्दैछन् ।

यसैगरी छत्रकोटमा एमाले मधुकृष्ण पन्तले ५ हजार ५५१ मत ल्याएर जितेका थिए यहाँबाट गठबन्धनले नेपाली कांग्रेसका अनन्त पौडेललाई उठाउने भएको छ ।

धुर्कोटमा माओवादी केन्द्रका भुपाल पोखरेलले ५ हजार ११६ मत ल्याएर जितेका थिए । तर गठबन्धनले अहिलेसम्म टुङ्गो लगाउन सकेको छैन ।

मदानेमा एमालेका दानबहादुर खत्रीले ४ हजार ४२३ मत ल्याएर विजयी भएका थिए । गठबन्धनले मदानेमा पनि टुङ्गो लगाउन सकेको छैन । 

मालिकामा एमालेका रितबहादुर थापाले ४ हजार ४२ मत ल्याएका थिए । गठबन्धले माओवादी केन्द्रका देवीराम अर्याललाई उठाउने निर्णय गरेको छ । 

रुरुक्षेत्र गाउँपालिकामा एमालेका नीलकण्ठ गौतमले ५ हजार २२२ मत ल्याएर जितेका थिए, त्यहाँबाट माओवादी केन्द्रका यदु ज्ञवालीलाई उठाउने निर्णय गठबन्धनले गरेको छ । 

यस्तै सत्यवती गाउँपालिकामा नेपाली कांग्रेसका पारिश्वर ढकालले जितेका थिए । अहिले पनि उनैलाई उठाउने निर्णय गठबन्धनले गरेको छ ।