नेकपा माओवादी केन्द्रले बागी उम्मेदवारी दिएका पार्टीका सबै उम्मेदवारलाई उम्मेदवारी फिर्ता लिन निर्देशन दिएको छ । वैशाख १५ गतेभित्र उम्मेदवारी फिर्ता नदिए पार्टीबाट बर्खास्त गरिने माओवादीले स्पष्ट पारेको छ । 
माओवादी बागमती प्रदेश कमिटीका अध्यक्ष सरल सहयात्रीले मंगलबार जारी गरेको विज्ञप्तिमा पाँच दलीय गठबन्धनलाई र वैज्ञानिक समाजवादका लागि नेकपा माओवादी केन्द्रका उम्मेदवारहरूलाई मतदान गर्न अनुरोध गरेका छन् । 

उनले पार्टी र गठबन्धनका विरुद्ध स्वतन्त्र चिन्ह लिँदै बागी  उम्मेदवारी दिने पार्टीका सबै उम्मेदवारलाई उम्मेदवारी फिर्ता गर्न निर्देशन दिँदै पार्टी निर्णय विपरित कदम नचाल्न भनेका छन् । ‘वैशाख १५ भित्र सबै बागी उम्मेदवारले मनोनयन फिर्ता नलिए नेपाल कम्युनिष्ट पार्टी (माओवादी केन्द्र) बागमती प्रदेश समितिले जारी गरेको निर्वाचन निर्देशिका अनुसार सबै जिम्मेवारीबाट तत्काल निलम्बन गरी कार्वाही प्रक्रिया अगाडि बढाइनेछ’, उनको विज्ञप्तिमा भनिएको छ । 

उनले पार्टी र गठबन्धनको आधिकारिक उम्मेदवारलाई सहयोग नगरी विपक्षी दलका उम्मेदवारलाई सहयोग गरेको पाइए कडा कारबाही गरिने पनि स्पष्ट गरेका छन् ।