निर्वाचन आयोगले स्थानीय तह निर्वाचनमा  ६४ प्रतिशत मतदान भएपनि ७७ मतदान केन्द्रमा मतदान स्थगित भएको जनाएको छ ।  आयोगको संयुक्त निर्वाचन सञ्चालन केन्द्रमा शुक्रबार राति १० बजेसम्म प्राप्त प्रारम्भिक विवरण अनुसार करिब ६४ प्रतिशत मतदान भएको र  ७७ मतदान केन्द्रमा मतदान स्थगित भएको जानकारी गराइएको हो । 

 राजनीतिक दल तथा उम्मेदवारबीच विभिन्न कारणले उत्पन्न विवादपछि १६ जिल्लाका २८ पालिकामा पर्ने ४३ मतदानस्थलका ७७ मतदान केन्द्रमा मतदान स्थगित भएको प्रवक्ता शालिग्राम शर्मा पौडेलले जानकारी दिए । 
 उक्त स्थानहरूमा आयोगले अन्यथा निर्देशन दिएमा बाहेक निर्वाचन अधिकृतले मतदान केन्द्रमा पुनः मतदान हुने मिति र समय यथाशीघ्र तोकी सूचना प्रकाशन गरी पुनः मतदान गराउने आयोगले जनाएको छ । 

 लुम्बिनी र गण्डकी प्रदेशका कुनैपनि मतदानकेन्द्रमा मतदान स्थगित भएको जानकारी प्राप्त नभएको आयोगले जनाएको छ । आज भएको स्थानीय तह सदस्य निर्वाचन छिटपुट घटना बाहेक समग्रमा शान्तिपूर्ण र उत्साहजनक रुपमा सम्पन्न भएको आयोगको दाबी छ । 

निर्वाचनलाई सफलतापूर्वक सम्पन्न गर्न मतदान गर्ने सम्पूर्ण मतदाता, निर्वाचनमा खटिएका सम्पूर्ण कर्मचारी, सुरक्षाकर्मी तथा निर्वाचनमा भाग लिने राजनीतिक दल एवम उम्मेदवार, आम सञ्चारमाध्यम, पर्यवेक्षक लगायत सबै सरोकारवालामा आयोगले धन्यवाद दिएको छ ।