पोखरा महानगरपालिकाको मतगणना पटक-पटक अवरुद्ध हुँदै आएको छ । 

कहिले दलको एजेन्टको लफडा कहिले मतगणनामा बस्ने कर्मचारीका गुनासोका कारण गणना अवरुद्ध हुँदै आएको हो । 

बारम्बार मतगणना अवरुद्ध भएपछि मतगणनास्थलमा मतपरिणाम सुन्न आएका सर्वसाधारण आक्रोशित भएका छन् । एक-दुई सय मत गणना नहुँदै पुनः रोकिने गरेको छ । 

प्रमुख निर्वाचन अधिकृत श्रीकृष्ण भट्टराईले राजनीतिक दलहरूले एजेन्टहरू पटक–पटक भेरिफाइ गर्न लगाएका कारण पनि मतगणनामा सास्ती भएको बताए । कति गणक कर्मचारीहरू बिरामी भएका कारण गणना बीचमै रोक्नुपर्ने अवस्था आएको उनको भनाइ छ । 

पहिलेको तुलनामा पारिश्रमिक कम भएकाले पनि कर्मचारी पाउन गाह्रो भएको आयोगको भनाइ छ । 

अघिल्लो चुनावमा प्रतिसिफ्ट एक हजार रूपैयाँ पाएका गणकले यसपालिका २०० रूपैयाँको हाराहारीमा मात्रै पारिश्रमिक पाएका छन् । त्यसमाथि १५ घण्टा खटिनुपरेको गणकहरूको गुनासो छ । अघिल्लो स्थानीय चुनावमा ८ घण्टाको एउटा सिफ्ट हुने गरेको कर्मचारीहरू बताउँछन् । 

अहिलेको निर्वाचन नियमावलीमा यस्तो व्यवस्था गरिएकाले सो विषयमा वैकल्पिक व्यवस्था गरिदिन मुख्य निर्वाचन आयुक्तको कार्यालयमा पत्र पठाइएको मुख्य निर्वाचन अधिकृतको कार्यालय पोखराले जानकारी दिएको छ ।