धेरै मतदाता भएको नगरपालिका मध्ये भक्तपुर जिल्लाको भक्तपुर नगरपालिकामा मतगणना चुस्त भयो । शनिवार बिहानबाट मतगणना शुरु भएकोमा सोमवार मध्यान्ह नतिजा नै सार्वजनिक भयो । समयमै मतगणना सम्पन्न गरेकोमा प्रमुख निर्वाचन आयुक्त दिनेशकुमार थपलियाले मुख्य निर्वाचन अधिकृतलाई फोन गरेरै धन्यवाद दिए । 

देशका अन्य नगरपालिका र गाउँपालिकामा मतगणना ढिलाइ भइरहेको समयमा भक्तपुरमा नतिजा छिटो आउनुमा मुख्य निर्वाचन अधिकृतको काम गर्ने शैली हो । भक्तपुर नगरपालिकामा मुख्य निर्वाचन अधिकृत गोपाल बास्तोला छन । 

‘खाना या चिया खाने समय भनेर छुट्याएनौ, मतगणना निरन्तर चलिरह्यो । केही कर्मचारीले रातिमा र केहीले दिउँसोमा गर्नुभयो’ मुख्य निर्वाचन अधिकृत बास्तोलाले भने ‘कर्मचारी ब्यवस्थापन चुस्त बनाउँदा छिटो नतिजा दिन सक्यौ ।’ जिल्ला अदालत भक्तपुरका न्यायाधीश समेत रहेका बास्तोलाले मतगणना देशभरकै जस्तो भएपनि जनशक्ति ब्यवस्थापन गर्दा छिटो नतिजा सार्वजनिक भएको बताए । कतिपय स्थानमा सिफ्ट नगरी एकैपटक कर्मचारीले रातदिन मतगणना गरिरहेका छन् । 

मतपत्र सटिङमा सामान्य कर्मचारी र गणनामा अधिकृत स्तरका कर्मचारीलाई लगाइएको थियो । मतगणना अवधिभर कुनै बिवाद पनि भएन । नेमकिपाको दवदवा रहेको भक्तपुरको मेयरमा नेमकिपाका सुनिल प्रजापति दोहोरिए । प्रजापतिले २९ हजार २ सय ५२ मत पाउँदा निकटतम प्रतिद्वन्द्वी नेपाली कांग्रेसका रामप्रसाद कासुलाले ३ हजार ४ सय ७ मत प्राप्त गरे । 

निर्वाचन आयोगले बुधवार निर्वाचित लाई प्रमाणपत्र वितरण गर्ने तयारी गरेको मुख्य निर्वाचन अधिकृत बास्तोलाले लोकान्तरलाई बताए । मतगणनामा ढिलाइ भइरहेको समयमा भक्तपुर अन्य ठाउँको लागि पनि उदाहरण बनेको छ ।