अमेरिकाको रक्षा मन्त्रालय पेन्टागनले सिरियामा सन् २०१९ मा ६४ जना सर्वसाधारणको ज्यान जाने गरी गरिएको हवाई आक्रमणले युद्धको नियम उल्लंघन नगरेको भन्दै आफैंलाई चोख्याएको छ । 

आतंकवादी संगठन आईएसका लडाकूहरूलाई मार्नका लागि चलाइएको भनी अमेरिकाले उक्त हवाई आक्रमणलाई जायज ठहर्‍याउन खोजेको भए पनि कतिपय सैन्य अधिकृतहरूले त्यो युद्धअपराध भएको बताएका छन् । 

सन् २०१९ को मार्च १८ मा अमेरिकाको एफ–१५ई लडाकू विमानले सिरियाको बागुज शहर नजिक भेला भएका महिला र बालबालिकामाथि बम खसाएको थियो । त्यसपछि पनि लगातार बम खसाउँदा सर्वसाधारणहरू मारिएको भनी द न्युयोर्क टाइम्सले गत नोभेम्बर महिनामा समाचार दिएको थियो । 

उक्त घटनामा ८० जना मारिएको अमेरिकी सेनाको सेन्ट्रल कमान्डले स्वीकार गरेको थियो । त्यसमध्ये १६ जना मात्र आईएस लडाकू थिए । 

अमेरिकी सेनाले चारजना सर्वसाधारण मात्र मारिएको स्वीकार गरेको थियो । बाँकी सबै आतंकवादी हुन सक्ने उसको जिकिर थियो । महिला र बालबालिकाले पनि हतियार उठाएको उसको दाबी थियो । 

तर यस विषयमा अनुसन्धान गरियो र त्यसको प्रतिवेदनको सार गत साता सार्वजनिक गरियो । प्रतिवेदनले उक्त घटनामा युद्धको नियम उल्लंघन नभएको निष्कर्ष निकालेको छ । अमेरिकी सैन्य कमान्डरले आईएसका लडाकूहरूलाई तारो बनाएको तथा सर्वसाधारण र लडाकूहरूबीचको भिन्नतालाई विचार गरेको प्रतिवेदनमा उल्लेख छ । 

तर घटनालगत्तै द न्युयोर्क टाइम्सले दिएको खबरमा सर्वसाधारणहरू बम आक्रमणमा मारिएको उल्लेख छ ।

रक्षा मन्त्रालयको प्रतिवेदनको पूर्ण पाठ तथा घटनामा मारिएका सर्वसाधारणको संख्या समेत खुलाइएको छैन । जम्मा दुई पृष्ठको सारांश सार्वजनिक गरिएको छ ।