उत्तरी युरोपका दुई मुलुक स्विडन र फिनल्यान्डले पश्चिमी सैन्य संगठन नेटोमा जोडिनका लागि औपचारिक निवेदन बुधवार पेश गरेका छन् । 

युक्रेनमाथि रुसले आक्रमण गरेपछिको सबभन्दा ठूलो भूराजनीतिक परिणामका रूपमा यसलाई हेरिएको छ । 

नेटोका महासचिव जेन्स स्टोल्टेनबर्गले दुवै देशको सदस्यता निवेदनलाई व्यक्तिगत रूपमा आफैं लिएका थिए । बेल्जियमको राजधानी ब्रसेल्समा रहेको नेटो प्रधान कार्यालयमा स्टोल्टेनबर्गले निवेदन स्वीकार गरेका हुन् ।

उनले यसलाई ऐतिहासिक कदमको संज्ञा दिए । 

नेटोका लागि स्विडनका राजदूत एक्सल वर्नहोफ र फिनल्यान्डका समकक्षी क्लाउस कोरहोनेनले स्थानीय समयअनुसार बुधवार बिहान ८ बजे निवेदन दर्ता गराएका हुन् । निवेदनमा तत्तत् देशका परराष्ट्रमन्त्रीहरूको हस्ताक्षर छ । 

फिनल्यान्डका राष्ट्रपति साउली नीनिस्तो र स्विडनकी प्रधानमन्त्री म्याग्दालेना एन्डरसन बिहीवार अमेरिकाको भ्रमण गर्दैछन् । उनीहरूले अमेरिकाका राष्ट्रपति जो बाइडनसँग भेटघाट गरी नेटोमा दिएको निवेदन र युरोपेली सुरक्षाका विषयमा चर्चा गर्नेछन् । 

रुसको आपत्तिका बावजूद स्विडन र फिनल्यान्ड अमेरिकी नेतृत्वको नेटोमा जोडिन लागेका हुन् ।