स्थानीय तह निर्वाचनको मतपरिणाम धमाधम सार्वजनिक भइरहेका छन् । 

चुनावको प्रारम्भिक नतिजाअनुसार राजनीतिक वृत्तमा सधैँ चर्चामा रहने अनुहारलाई यो चुनाव फापेको देखिन्न । मतपरिणामअनुसार उनीहरूको आफ्नै प्रभाव क्षेत्रमा जनविश्वास घट्दो देखाउँछ ।

सुदूरपश्चिममा आफ्नै ‘कोर’ क्षेत्रमा हार बेहोर्नेमा प्रधानमन्त्री शेरबहादुर देउवादेखि पूर्वमन्त्री लेखराज भट्ट, रामजनम चौधरी, गौरीशंकर चौधरीलगायत छन् ।

देउवाको वडामै कांग्रेस पराजित

प्रधानमन्त्री एवं नेपाली कांग्रेसका सभापति शेरबहादुर देउवाको वडा डडेल्धुराको गन्यापधुरा गाउँपालिका वडा नम्बर १ हो, जहाँ नेपाली कांग्रेसका वडाध्यक्षका उम्मेदवार पराजित भए । सो वडामा नेपाली कांग्रेस बिपीका उम्मेदवार नरेश भण्डारी वडाध्यक्षमा निर्वाचित भएका छन् । 

वडाध्यक्षमा निर्वाचित भण्डारीले ६७३ मत र कांग्रेसका उम्मेदवार चन्द्रबहादुर देउवाले ५४४ मत ल्याए ।

तर गन्यापधुरा गाउँपालिका अध्यक्षमा भने कांग्रेसका उम्मेदवार इन्द्रबहादुर कार्की दोब्बर मतान्तरसहित निर्वाचित भएका छन् ।

गृहनगरमै लेखराजका भाइ पराजित

नेकपा एमालेका सचिव तथा पूर्वमन्त्री लेखराज भट्टको गृहनगरमा एमाले उम्मेदवारले पराजय भोग्नुपरेको छ । 

कैलालीको गोदावरी नगरपालिकामा एमालेले सचिव भटट्का भाइ गोकर्ण भट्टलाई मेयर उम्मेदवार बनाएको थियो । 

मेयरमा नेपाली कांग्रेसका वीरेन्द्र भट्ट विजयी भएका छन् । उनले लेखराज भट्टका सहोदर भाइ गोकर्णलाई ४ हजार २७७ मतान्तरले पराजित गरेका हुन् । 

निर्वाचन अधिकृतको कार्यालयले दिएको जानकारी अनुसार मेयरमा निर्वाचित वीरेन्द्रले १५ हजार ५०१ मत ल्याएका छन् । उनका निकटतम प्रतिद्वन्द्वी गोकर्णले ११ हजार २२४ मतमा सीमित भए । 

३ महिने पार्टीले भत्कायो रामजनम र जनकराजको आधार इलाका

नेपाली कांग्रेसका नेता एवम् पूर्वमन्त्री रामजनम चौधरीको आधार इलाकालाई भर्खरै दर्ता भई चुनावमा होमिएको रेशम चौधरीको नागरिक उन्मुक्ति पार्टीले भत्काएको छ ।

पूर्वमन्त्री चौधरीको घर रहेको जोशीपुर गाउँपालिका–४ को वडाध्यक्षमा रेशम चौधरीकी पत्नी रञ्जिता श्रेष्ठ चौधरी नेतृत्वको नागरिक उन्मुक्ति पार्टीका रामजनम चौधरी निर्वाचित भएका छन् । 

उनले नेपाली कांग्रेसका उम्मेदवारलाई पराजित गरेर आफ्नो प्यानलसहित वडाध्यक्षमा विजयी भए । पूर्वमन्त्री चौधरीको घर यही वडामा छ । २०७४ को स्थानीय तहको निर्वाचनमा जोशीपुर गाउँपालिकामा कांग्रेसले जितेको थियो । 

त्यस्तै पूर्वराज्यमन्त्री रहेका नेपाली कांग्रेसका नेता जनकराज चौधरीको घर रहेको जोशीपुर गाउँपालिका ५ मा पनि नागरिक उन्मुक्ति पार्टीले नै जितेको छ ।

सो वडामा नेपाली कांग्रेसलाई २२६ मतले पराजित गर्दै नागरिक उन्मुक्ति पार्टीका अनरकुमार चौधरी विजयी भएका हुन् । 

वडा मात्रै होइन, कैलालीको टीकापुर नगरपालिका, जानकी गाउँपालिका, जोशीपुर गाउँपालिका, भजनी नगरपालिकाले नागरिक उन्मुक्ती पार्टीले लिड गरिरहेको छ । सो क्षेत्र अघिल्लो निर्वाचनमा रेशम चौधरी जितेको क्षेत्र पनि हो । 

हाल सो क्षेत्रमा अन्य दलको कन्तबिजोग छ । सो क्षेत्रबाट कांग्रेस नेता तथा सुदूरपश्चिम सरकारका आन्तरिक मामिला तथा कानून मन्त्री डा. रणबहादुर रावल पनि प्रतिनिधित्व गर्छन् । 

गुमनाम गौरीशंकर

मन्त्री छँदा नेकपा माओवादी केन्द्रबाट एमालेमा प्रवेश गरेका पूर्व मन्त्री गौरीशंकर चौधरी स्थानीय तह निर्वाचनमा गुमनाम देखिए । उनको प्रभाव क्षेत्र कैलाली निर्वाचन क्षेत्र नं. ३ स्थित स्थानीय तहमा एमालेलाई निकै सकस छ । कैलारी गाउँपालिका–२ बसौटी घर भएका गौरीशंकरको वडामा कांग्रेसका उम्मेदवारले जीत हात पारेका छन् । 

लेखकको वडामा समाजवादीको झण्डा 

कांग्रेस नेता तथा पूर्वमन्त्री रमेश लेखकको घर भएको कञ्चनपुरको एक वडामा एकीकृत समाजवादीले जितेको छ ।

जिल्लाको वेदकोट नगरपालिका–८ को वडाध्यक्षमा समाजवादीका वेदकोट नगर अध्यक्षसमेत रहेका महेशराज जोशी निर्वाचित भएका छन् । वेदकोटमा नेकपा एकीकृत समाजवादी र नेकपा माओवादी केन्द्रबीच गठबन्धन भएको थियो । 

गठबन्धनका तर्फबाट वडाध्यक्षका उम्मेदवार जोशीले आफ्ना निकटतम प्रतिद्वन्द्वी कांग्रेसका दिलु बोहरालाई ११० मतको अन्तरले हराउँदै अध्यक्षमा निर्वाचित भएका हुन् ।