रुसका सेनाप्रमुख भ्यालरी गेरासिमोभ र अमेरिकाका जोयन्ट चीफ्स अफ स्टाफ मार्क मिल्लीबीच बिहीवार फोनवार्ता भएको छ । 

यी दुई अधिकारीले पारस्परिक हितका अनेकौं विषयमा कुराकानी गरेको रुसको रक्षा मन्त्रालयले विज्ञप्ति जारी गरेर जानकारी दिएको छ । 

अमेरिकी पक्षको अनुरोधमा गरिएको वार्तामा रुस र युक्रेनबीच चलिरहेको द्वन्द्वको चर्चा पनि भएको बताइएको छ । 

अमेरिकाको रक्षा मन्त्रालयले चाहिँ यस विषयमा केही बताएको छैन ।

‘सैन्य नेतृत्वले सुरक्षाका विषयमा छलफल गरेका छन् र संवादको ढोका खुलै राख्ने सहमति गरेका छन्,’ मिल्लीका प्रवक्ताले बताए । ‘विगतको अभ्यासबमोजिम उनीहरूबीचको संवादका विवरणहरू गोप्य राखिएको छ ।’

पश्चिमी सैन्य गठबन्धन नेटोका सुप्रिम अलाइड कमान्डर टड वोल्टर्सले गेरासिमोभ र मिल्लीबीचको वार्ताले युक्रेन संकटको कूटनीतिक समाधानमा योगदान गर्ने आशा लिएको बताएका छन् । 

एक साताअघि अमेरिकाका रक्षामन्त्री लोयड अस्टिन र रुसी समकक्षी सर्गे शोइगुबीच पनि फोनवार्ता भएको थियो ।