युक्रेनका राष्ट्रपति भोलोदीमीर जेलेन्स्कीले बिहीवार राष्ट्रको नाममा सम्बोधन गर्दै रुसविरुद्ध नरसंहारको आरोप लगाएका छन् । 

रुसले जतिसक्दो धेरै युक्रेनीहरूलाई मार्नका लागि प्रयास गरिरहेको उनले बताए । 

रुसी सैनिकहरूले डोनबास क्षेत्रलाई नरक बनाइदिएको जेलेन्स्कीको आरोप छ । उनीहरूले उत्तरी युक्रेनको चर्निहिभ क्षेत्रमा पनि धेरैजनालाई मारेको जेलेन्स्कीले बताए । हत्या र विनाशको कुनै सैन्य व्याख्या नरहेको उनको भनाइ छ ।

उनले भने, ‘अतिक्रमणकारीहरू दबाब बढाउन थालेका छन् । अहिले नारकीय स्थिति छ र त्यो कुनै अतिशयोक्ति हैन । सेभेरोडोनेत्स्कमा गरिएको निर्मम र अर्थहीन बमवर्षाका कारण उक दिनमै १२ जनाको मृत्यु भएको छ । रुसी सेनाले अन्य शहरहरूमा बम र गोली प्रहार गरेका छन् । युद्धको क्रममा भएको आक्रमण मात्र नभई यो युक्रेनी सिध्याउन चालिएको कदम हो ।’

रुसको यो आक्रमणलाई युक्रेनीहरूको नरसंहार भन्न मिल्ने र अतिक्रमणकारी रुसीहरूलाई न्यायको कठघरामा अवश्य उभ्याइने उनले बताए ।