नेपालमा लत्ताकपडादेखि भान्सामा प्रयोग हुने सामानसम्मका अधिकांश सामान आयातबाटै परिपूर्ति हुन्छ । नेपालीले आफ्ना छोराछोरी विदेश पठाउने र पैसा भित्र्याएर सामान किन्ने प्रवृत्ति बढिरहेको विषय संसद सदस्य गगन थापाले संसदमा उठाएका छन् ।

नेपाली विदेशिने र सामान मात्रै आयात हुने विषयसँग जोडेर उनले भने, ‘नेपाल मान्छे बेच्ने, माल सामान किन्ने देश भएको छ । यसैमा नेपालीको घरधन्दा चलेको पनि छ ।’

देशमा आयात बढेको र निर्यात नभएको विषयसँग जोडेर थापाले भने,'सरकारले १० वर्षे योजना बनाएर आयात प्रतिस्थापनमा गर्न सक्छ । सरकार भन्सार राजस्व लिने मात्रै होइन्, नेपाली उत्पादन प्रवद्र्धन गर्नमा पनि लाग्ने हो । यसले नेपाली उद्योगको प्रवर्द्धन हुन्छ ।'

यसका लागि तात्कालिन र दीर्घकालीन योजना बनाउनुपर्नेमा उनले जोड दिए । सरकारले उत्पादन बढाउने, निर्यात प्रवर्द्धनमा भन्सार छुटको व्यवस्थासहितको एक दशकको योजना बनाउनुपर्ने थापाले बताए ।

आयात कम गर्दै उत्पादन बढाउन सकिने र निर्यातका संभावना भएका १० वटा क्षेत्र छनोट गरेर आफ्नो पार्टी कांग्रेसले सरकारलाई सुझाव दिइसकिएको थापाले बताए । यस्तो सुझाव अनुसार सरकारले २०७९ देखि २०८९ सम्म उत्पादन दशक मनाउने याेजना ल्याउनुपर्ने थापाकाे भनाई छ ।

सरकारले १० वर्ष काम गर्ने गरी औद्योगिक क्षेत्रको छनोट गर्नुपर्ने उनले बताए । यस्तो उद्योग छनोट गर्नका लागि उद्योग मन्त्रालयले अगुवाइ गर्ने र सबैले समर्थन गर्ने हो भने  योजना सजिलै पूरा गर्न सकिने उनकाे भनाई छ । 

का‌ंग्रेसले धागो, जुत्ता, निर्माण सामग्री, कृषि, खाद्यान्न, वन पैदावार र जडिबुटी, हस्तकला तथा नयाँ अवसरका क्षेत्र पहिचान गरेर सरकारलाई सुझाव दिइएकाे थापाले बताए । यी क्षेत्रमा सरकारले सफ्ट पोलिसी बनाएर भन्सार दर १० वर्षसम्म छुट दिएर उत्पादन बढाउँदै निर्यात बढाउन सकिने थापाकाे सुझाव छ । 

उनले तथ्यांक नै पेश गरेरै भने ‘नेपालमा वार्षिक ९ करोड जोर जुत्ता खपत हुन्छ । उत्पादन भने ४ करोड जोर मात्रै छ । ५ करोड जोर विदेशबाट आउँछ । नेपालमै जुत्ता उत्पादनको क्षमता भने १६ करोड जोरसम्मको छ ।’ क्षमता हुँदाहुँदै पनि बाहिरबाट न्यून भन्सार मूल्यांकन भएर आउने जुत्ताको दबदबा बढिरहेकाले नेपाली जुत्ता उद्योगले बजारमा प्रतिस्पर्धा गर्न नसकेको संसदमा थापाले बताए ।

नेपालमा आउने कपडामा पनि न्यून मूल्यांकन हुने गरेको, चोरी पैठारीबाट आउने भएकोले नेपाली उद्योग टिक्न नसकेको उनले बताएका छन् । यसका लागि सरकारले न्यून भन्सार मूल्यांकन र चोरी पैठारी रोक्नुपर्ने थापाले बताए ।

भिडियाेमा हेर्नुहाेस् संसदमा गगनकाे सम्बाेधन-