अर्थमन्त्री जनार्दन शर्माले आगामी आर्थिक वर्षकाे बजेट विगतको जस्तो निरन्तरता मात्रै नहुने र परिवर्तित स्वरूपमा आउँने बताएका छन् । प्रतिनिधि सभा संसदमा भएको पूर्व बजेट छलफल र त्यसमा संसदले उठाएका प्रश्नहरूको जवाफ दिँदै अर्थमन्त्री शर्माले  बजेट नीतिगत रूपमा केही परिवर्तन भएर आउने जानकारी दिए ।

उनले अहिलेको अर्थतन्त्रको समस्या समाधान गर्न केही नीतिगत व्यवस्था गर्नैपर्ने र केही सीप लिनुपर्ने आवश्यकता भएकोले विगतको जस्तो निरन्तरतामा मात्रै बजेट सिमित नहुने बताए ।

शर्माले संसदमा भने ‘यो वर्षको बजेट पनि विगतमा जस्तै गरी बनाउने हो भने निरन्तरता मात्रै हुन्छ । विगतका सरकारले बनाएको बजेट कार्यान्वयन हुन नसक्नु र खर्च नभएको सहितका समस्यालाई दृष्टिगत गरेर यो वर्षको बजेट आउने छ ।’

पुरानो प्रविधि र कार्यान्वयनको अवस्थालाई अहिलेको बजेटले बदल्न खोजको उनको भनाई छ । कार्यान्वयन हुन नसक्ने कार्यक्रम बजेटमा राख्न नखोजिएको अर्थमन्त्रीकाे भनाई छ

'बजेटमा विगतको जस्तै नाम मात्रैका आयोजनालाई राष्ट्रिय गौरव किन भन्ने ? कानूनी र संरचनागत सुधार विना ल्याएको बजेट कार्यान्वयन फेरि विगतकै जस्तो हुन्न ?’ अर्थमन्त्री शर्माले प्रश्न गरे । यो वर्ष विगतमा लागू नभएका र कार्यान्वयन हुन नसकेको अवस्थालाई मूल्यांकन गरेर बजेट ल्याइने अर्थमन्त्रीले बताए ।