रुपन्देहीको बुटवल उपमहानगरपालिका कालिकानगरमा जेब्रा क्रसमा  मोटरसाइकलको ठक्करबाट एक जनाको मृत्यु भएको छ । 

शुक्रबार राति सवा १० बजेको समयमा योगिकुटीबाट बुटवलतर्फ आउँदै गरेको लु५४प ७३०७ नम्बरको मोटरसाइकलले सिद्धार्थ राजमार्गको कालिकानगरमा बाटो काट्दै गरेका ७२ वर्षीय पशुपति भट्टराईलाई ठक्कर दिएको हो ।

मोटरसाइकलको ठक्करबाट गम्भीर घाइते भट्टराईको उपचारको  लागि अस्पताल पुर्‍याउँदा मृत्यु भएको ईलाका प्रहरी कार्यालय बुटवलले जनाएको छ ।

त्यस्तै मोटरसाइकल चालक बुटवल ४ आदर्शनगरका विरेन थापा पनि घाइते भएका छन् । 

उनको हात, खुट्टा र आँखामा चोट लागेको र बुटवलकै चौराहा अस्पतालमा उपचार भएको छ ।